AW! ZION CANU, SAP U HEET DELAH SAW

AW! ZION CANU, SAP U HEET DELAH SAW
By: Chronostrepho

Na thlaang theen tangkiik ma aw, azeh aw!
Aw, na thlaang theen tangkiik! Namih rawi khaw akhu pon ni.
(Laathli ka laa 1:15)

Zion khawpui taawl, raipaai bawtui urh urh a pailumna hyn ah, bawtui on na thuut u heet tih, cyp na nuih ruila ka kut na phoih tih, thleemben khaw khaawn hawi a khum vengah, ding ary la n’zingzaawi haih hih te ka pok vengah, a hawng kai aw te, ka ti. Chrismas a pha tawm zun atah, thing raw boih rokbah u tih paai u. Khaw ty hoile u hang, khawtlan dip tih khaw voh voh sik pon. Tlaang ah nou paaithli ur ur pailum, ramhym thingtlang dawngah rai soprep lawng diklai thlawngkung aka thang te ada dou angla paai u. Cang ah ty boih tih paw lu rawngsaw on paw le kah sawngtym paithli khaw a baawk la, a thiim la, a eng la phyrh u tih a byh theen thlang. Kawngaih azeh aw, khaw-awk hinaak athai on Christmas hin ah na thoicam u vengah zet na ropna tih, dank an hah ro ro nawh. Na theen thlang mah aw, ka rukngaih aw! Aw, lungna na kap tangkiik. Na mik rawi khaw akhuu mol mol aka awm mik angla awm tih na bawitui tah cangmai kaawi bawtui la syyt na rim. Zyyp na zah ruila na kut kan phoih vengah na mikkel on ryyp nan byh. Christmas hin ah bawk im khui ah awmngaih tangkiik ruila, "Vandawng Sengpharang lawng Awmtheenna a ceh taak," ti laa n'sak u tih Bawipa thangna ng'ym veng kahthli te ka pok pok thuk vengah, ka thin but avan thah mah aw!

Khawhaal ty a pha tawm tih pingparouh awl on thangrawh thangvau pai urh urh urh pailum, suva boih lawng awlka on ring u tih tlaang on mawl huuiah kahawmawng a zaal phai vengah nang on khawlawng haih n'ceh hihthli te nizaw, thahong khaw ka ming tlaih nawh, nang kah mikhaai ka dan tih ka kut cot nan phoih tih, "Ka mia aw, kan lungna thlang!" na tite nizaw? Na mikhaai byh ka hah nawh tih, kan byh khing vengah, "Tu ah he tila nan byhna, ka zak thlang," na ti tih na mikhaai te cyp na nuih ruila na kut nou ca on khop na dah. Kai lawng, "Kan lungna yyt ah, na mikhaai byh ka hah nawh tih, kan byh ta," kan tina ruila na kut te ka van khoo tih na bokhok ah ko kan phoih. Na mikhaai zilh na thiimsak tih, ka raangah na khut thlum on thek hih thek thum nan tum phai, te vengah ko kan tuuk tih ka raang dawngah kan kawp congah, na beeng nou ca te ko kan mawk. Kan lungna yyt ah kan dolk zoon kaw la huut.

Nang onah thikat la n'zingzawina hih on m'pawngpa ram awmnathli te oo, ka hiil aroh de, kawngaih aw, ka tha houh avan suh. nang on ngawlhna ngawthli on m'painathli, kai lawngt palom ka thui tih dik dik na nuihna hynthli te ka hiil aroh vengah, ka lung a ding yyt ah ka cuih la taal. Ka awlraawng kop avan khaih tih ka awl tui law tlaih nawh. Im la ka mel tih nan lungna capatthili te kop ka tee vengah kawngaih aw, ka mikphi tui lawng ka mik khop avan dah tih, na kut thut ca khaw ka tee thai nawh. Na capat te oo, ka mikphi tui ah boih zulpyym.

Ka rukngaih a zeh aw, nang kan lungna yyt ah, nang kan huur ka titih, thlangtheethli lawng ka baawng a rek phuk tola cai on avan deeng u tih, atling azaal la, ka kut ka khaw thicung on thing dawngah phut avan heen u vengah pateng khaw ka yh de ta. Kan cil kan poo heet tih, tlang sawm kah thingthlor angla, kan thlor tih kan lungvatna lii vengah nan pade ramlang taak he tlou ka ti ouh he. Aw! Zion canu, na thlang theen mui ka hah thlan hyn. Kai on thlemhah kawnphai ah siiksyyk cal hih bal de lah sih. Sap u heet langtah, ciah kop de lah.

(Matu ram kah hula ongcathli lawng Pathen aka ming nawh muisai aka bawkthli kah zookna ah, aka thlawnkung Bawipa a pade ramlang taak u tih a hingna a pum aka peethli dawngah Bawipa kah kawthena tyngsakna.)