Krismas hin on Tuhkai u tih

By : Stephen Thang

Diklai han ah thlangbol bro nawh la a pung angla pokna khaw bro nawh la zahawh. Kum rook December thla pha veng awmngaih tangkiik on Bawipa Jesu thangna khawhin te ana ym u. Diklai thlawnkung Bawi thangna khawhin te ym hamla awm pai. Tede, khatsut lawng atah Krismas hin he awlpui betla a pok u tih khatsut lawng atah awlpui nawh la a pokna a awm dawngah adang kah angla tyngsak hamla ka ngaih.

Krismas Kawnghu a tawi tyngsakna:
Nova lawng ca pathum a cuun tih Shem, Ham on Japhet a mingna. Ha lawng Kusa a cuun, Kusa lawng Nimrod a cuun. Tekah Nirod tah diklai han ah thara thlaang, Pathen haai-ah tha ka ra sakaap thlaang la awm (Gen. 10:1-9). Himrod he thara thlaang la a awm dawngah khawpui pareet a uk tih Babel tila miing asak. Babel kalawng Babilon tite va awm. Babel tah prautyk la calna ti ngaihna ni. Te kah Babel khawpui aka synkung kah thangpawmna lungbui te Bawipa lawng a ngaih nawh dawngah Babel imsaang te a phe pe. Te veng kalawng dilai dawngah awlcawm awlcee pekbouna te awm (Gen. 11:1-9).

Nimrod te tetih angla tharana on ah a betoot dawngah a ram khui kah thlangping lawngah Pathen angla a bawk u. A patawng hang tih a dyk tawm veng hetihla awl a yyn. Kai ka dyk atah khawmik khui la ka kuun selang khaw ka sa ai, te dawngah khawmik te bawk uh atina. Amah dyk hu atah a pilnamthli boih lawng khawmik te a bawk u. Tih a dyk hu can a div cong atah a zu Samiram te a bung ry. A cuun ham koi ca te huhsit la a awmna nawh hamla titih hetihla khaw a khan. A peeng a raam khui kah bawi maangthli boih a khy tih sengpahrang im haai-ah belphaithli a khyhsak. Te kah belphaithli dawngah sui, tangka on lungvar phu tlouthli a mah pok a awm atah he kah ka cuun ham koi camaw he khawmik kah ca la awm ai tila awl a khyh.

Pilnam rangpui lawng khawmik dawngah khaw aka sa Nimrod kah cap ate lamtoom on belphaithli te khaw a zin thlan veng talawng ah boih a tloong u. Nimrod zu Samiram lawng a laipaithli te khawzin ah a hyp la a tuih tih sui, tangka on lungvar phu tlouthli te talawng ah belphai dawng a khyhsak. A vyn myncang khaw a thaih venga atah belphai dawng kah sui, tangka on lungvar phu tlouthli te rangpui lawng a huh u. A kawpok calla a raisak u tih sengpahrang nu kah a ca he khawmik kah a ca ni tila rampum ah a phawngsak. Camaw te December ni 25 hin ah a cuun, tih Tamut tila ming a sak. (Ezek. 8:14). Tamut te a roong hang atah ana pa Nimrod zyng ah Sengpahrang a bi. Tamut a dyk hu atah kum rook December thla ni 25 hin te Tamut kah thang hin ym poi a sai u popa.

Te cong Rawm ukna ty (AD 312) a pha veng Rawm ukkung bawi Kunstantin tah raltuk a ceh hinat ah vaan ben ah vailam tung a huh. He raltukna ah ka taa atah Kricathli kah Pathen ka bawk ai tila awl a kam. A awlkam angla raal a taa tih te veng kalawng Tamut sengpahrang kah thang hin ymna poi December ni (25) hint e Bawipa Jesu thangna hin la a thaw pe. Te hin kalawng tihin to Kri thlangbol a kuum ngai lawng December ni 25 hin te Jesu thang hin la po ana hawna u.

Adang kah pokna he kop byh lah sih:
Bethlehem khaw vaitaw im ah cuun ham ni, thla sop on caming cuun tih, (Luka 2:6) tila Baibul lawng a thui. Meri he thla sop la ca a cuun tite ming u. Dilai dawng thlangcuih mingthangthli kah tel Encyclopedia Britanica Cabu dawng “huta khat lawng ca a cuun veng huta atah hin 266-267 law tih, tawngpa atah hin 270-271 law” tila a thui. Te dawngah cuun hin 270 tihnawh atah 271 hin te a hula kop teekawi pum a kym hin te ming u.

Juda Calendar teena ah Bawi Jesu thangna kum tah 3759 lum, roshhashana, Tirhi ni (1) hin la awm. Juda Calendar 3759 lum te ningmi kah Calendar ah 3 BC la awm. Roshhashana tah Rengsara tum poi (Yom Teruah) la awm. Juda Calendar kah Tirhi ni (1) hin te ningmi kah Calendar (Karikorian Calendar) ah September ni (11) la awm. Te dawngah Bawi Jesu thang hin he 3 BC September ni 11 tila Roy A. Rein Hold lawng a thui.

Khawhinthli dawngah Pathen Kamthlahna:
“Khawhin pakhat lakah pakhat theen bet tila khasut lawngah a pok, thlaang boih a kawngaih angla hawn she. Khawhin aka tot lawng Bawipa hamla a tot tih, aka tot nawh lawng khaw Bawipa hamla tot nawh, (Rawm 14:5-6)” tila Baibul lawng ng’cangpui. Te dawngah khawhin he awlpui la pok nawh tih, khawhin aka syynkung Pathen he awlpui betla ka pok. Pathen lawng a sai thaihu boih he “Amah dawng kalawng Amah hamla a sai (Rawm 11:36).

Te dawngah Krismas on tuhkai u tih a khawhin lak ah Jesu Amah he awlpui ngai tih, a khawhin ymna lakah Jesu Amah ym ngai hamla theen. Jesu he vai at byng cuun la a awm monih, Amah aka tangnathli thinkaw khui ah hinrook a thai la cuun popa hamla awm.
Krismas tihe tu nym?
Krismas tit ah “Pathen kah laksawng” tina ni. “Metihtiah ningmi hamla camaw cuun la awm (Isai. 9:6), ti on “Pathen lawng diklai (thlangthawlh) a lungna tangkiik dawngah Capa khyhdyyn a peek (Johan 3:16)” ti awl he tuhkai u. Pathen kah lungna khui kalawng aka thong laksawng tah Capa Jesu Kri rangon dungzan hingna he ni (Rawm 6:23). Laksawng tihe mah ben kah saina, thahyrna angoo myhla a zo peek te ni. Pathen kah laksawng peek dungzaan hingna dawng thlanghing thahyrna on saina thuum nawh tina ni.

Krismas kah kamthlahna:
Pathen kah dungzaan kamthlahna tah awlpui pakhat la awm. Dilai thlangthawlhthli thlawnna he Pathen kah kamthlahna a bou kok la awm. Pathen tah Muithla la awm (John 4:24). Thlangthawlhthli tah taksa la a awm dawng muithla kah thaihu te ming u nawh (I Kawrin 2:14). Te dawngah pumas thawlh dawngah aka tliim dingrii thlangthawlh thlawn hamla Pathen te taksa pum la va law (Heb. 10:5, Joh. 1:14). Thlanghing coongna dawng kalawng Pathen kamthlahna a sopna hamla ni.
Krismas aka dou khasutthli:
Herod: Jesu thang ty ukkung bawi la awm. Jesu kah thangna te thlang ngawnna on a dou. Amah saw-ah ukkung awm a ngaih nawh dawngah thlang a ngawn. Jesu dilai dawngah cuun la a awmna tah dykna khui kalawng hingna peek hamla ni. Te dawngah Krismas ng’douna u lawng muithla be thlangngawnna law awm myhla thlanghing peekna la awm seh.

Khawlaw ben kah thlangcuihthli:
Saw ben aisi maawtna on Bethlehem vaitaw akhawng dawng kah camaw te a huh u tih a phu aka tlou laksawng on a bawk u. Mami ah a phu aka tlou kok hingna peesengna on Jesu te dou u van sih.
Tuudoonthli: Van thlaang kah awlthang a zaak u, a tuuthli a ceh taak u tih camaw te a huh u veng Pathen te kawpok rai tangkiik on a thangtheensak u. Khyhton kova on dilai thaihu boih te cehtaak tih Jesu te dou u silang kawpok rai Pathen hingna on thangtheensak u van sih.

Simion: A Ciim Muithla kah maawtna rangon bawkim a pha tih Camaw te a huh. A kut ah a pawm tih Pathen a thangtheen. Dilai Thlawnkung Bawi he ka mik roo on ka huh po dawng ngaimaawng la ka dyk pon ai tila Bawipa a thangtheensak. Jesu Kri he mah thinkaw muithla mik on huh tih mah muithla kut on pawmna a awm nawh atah hingna ah ngaimaawngna tihe awm thai nawh.

Te dawngah Krismas on tuhkai u tih pokna a phun phun awm mai cakhaw Bawipa pakhat byng ni. Huhna a phun phun awm mai cakhaw Muithla khat byng ni. Pathen kah dungzaan kamthlahna dawng Kri hing cuuthaih tih thinkaw, lungbui khui ah Kri a thai la cuun popa rui on Pathen kah bawilenna hamla hing u van pon sih tila he catawi on thapeek hamla ka ngaih. “Soprep boih he Amah dawng kalawng Amah rangon Amah hamla hawn seh.” Amen.

TU HAMLA NA AWM?

TU HAMLA NA AWM?

Thlaanglawng thaihu a pok mon de,
BAWIPA kah kamthlahna ni
aka coong, (Tahtuk 19:21)

Hin at tah ka pia khat lawng ana pa teng la n'ceh pui. Ana pa te im ah ana awm nawh. Laikaawk la awm mai cawi ni, titih im kalawng laikaawk la pahoi n'ceh pui. Laikaawk tide caang lingna laikaawk nawh ni. Sangvut lingna laikaawk la awm. Laikaawk te kau thlang. Sangvut khaw hin tih ah hamla awm pon. Laikaawk laklung ah teng (tank) angla awm de, a hu ben atah thaihu phuihna angla khaw a ka awm seh khat te awm. 'Ka pia Vern, ke kah aka awm ke n'tu nym ca? Mawtawkaa aw?' ka tina. Te vengah ka pia lawng a nuih ruila, 'A pa lawng avan thui badai,' n'tina. Ana pa va law tih, 'He kah seh he sangvut ah na seh ni,' n'tina. Te congah seh saw la a luui congah kai khaw luui hang van, n'titna tih ka luui hang van. Te cong atah seh te a mawng. A haai ben ah seh lawng sangvut te bawn bawn a ah conga a hu benla a tanawlh phai. Tekah cangvui te seh khat bal lawng phawng phawng a til congah a cang te a hu ben kah cangpaai angla aka awm khuiah nawi nawi a kawng. Seh a hu ben kah adang ben ngaai ah aka awm seh bal lawng cangziing te no no a tum bal tih patong patong a ceh taak. Ka byh vengah a byh theen thlang. Seh pakhat mai lawng, sangvut a ah, a til, cangziing a tum tih vai la bibi cong kang. Kamah khaw kah caang ng'ah na kawinih kawlkalh ah ni a cong suide a! ka ti. Te vengah, ka pia kah ana pa lawng a nuih ruila, 'Na mah khaw ah he ang awm van aw?' n'tina. 'Mekah a awm bal ai, te nawh aw ka ming nawh laawt. He on tah cang ah zoi tahe a,' ka tina.

Thlangcuihthli lawng thaihu a sai u vengah, n'tu a sai, tu hamla a sai, tu a phu aka awm, tihe a pok tih a sai u. Tepek ah seh te, cang ah-na seh, caang ah-na hamla sai la awm tih, caang a ah-na. Thlangcuihthli kah thaihu sai la a awm dawngah hawna hamla a phu awm tangkiik. Pathen tare tah cuihna ah, mingna ah, thoomna ah, soprep boih ah aka sop kok tlongkholh la awm. "Kai tah Alpha on Omega, lamha cyk on hukhyng kok, Akuung on a dawng la ka awm,' (Awlphawng 22:13) Pathen lawng ti. Tihin hang kah thlanghing cuihna he kawpok la rai tangkiik. America ah aka awm on zilh dawngah praap m'voom u thai. Computer dung la awm hang pon tih, ming lek nawh tola cuihna he saang pon. Diklai thlangcuih lawng a ngaihna saisak hamla seh a sai thai atah aka cuih kok Pathen tare lawng ta thaihu a sai he mailai la, a phu awm myh la sai nawh my nizaw? Thlangcuih kah thaihu sai tah kawpok la n'raisak u tih Pathen kah kawpok rai thaihu sai hetah amah pok ah aka awm angla ng'ngaai u. Apaai thing pakhat ke metila a paaina tite m'pok kawinih m'pok lek thai nawh my. Thlanghing kah thaihu sai he awlpui la m'pok u tih thaihu kawpokrai aka van saikung Pathen te lat ng'koh thai nawh. Bawipa lawngah, Solomon kah bawilenna lawng thlemrim dawrai pateng khaw a pha monih, (Mathai 6:29) tila avan thui. Seh a rawk atah thlaang lawng kop a tlaih thai. Tede thlanghing he a dyk atah a u lawngkhaw thawh kop thai tlaih nawh. Pathen byng lawng ni a thawh thai. Ahih tah thawhkopna on hingna la awm (Johan 11:25). Thlanghing cuihna lawng a pha thai nawh cuihna aka khyhkung tah Pathen ni.

Aka cuih kok Pathen, nang aka lungvatkung Pathen lawng, a capa thii on na thawlh bongha boih te a van tuui tih nang hamla lawngpui theen boih avan rokbah pon. Te dawngah ni diklai dawngah nava thang. Pokna, mengtengna, kamthlahna awm myhla thlanghing lawng pateng khaw thaihu a sai nawh atah Pathen tare lawngtah nang he mailai la n'sai monih ta. A kamthlahna sopsak hamla ni n'sai. He he na ming nawh kawinih na dalraa vetih, lawngpyng ceh li ah aka pal praap angla na awm ai. Namah ngaih thaihu na sai mai suide coong nawh my (Tahtul Awlcuih 19:21). Na lu dawng kah sam tham at pateng khaw na mym na baawksak thai monih (Mathai 5:36). Thaihu aka saikung lawng a sai thaihu metila ka hawna ai, tite a ming angla, nang aka saikung Pathen byng lawng ni nang ham kamthlahna te a ming. A kamthlahna on a mengtengna he dungzaan to aka cak la awm (Saam 33:11). Te Pathen kah kamthlahna a kawngaihna dawng teah na thinkaw boih te hal, te atah na kamthlahna boih te cong ai (Saam 37:5,6). Kamthlahna khyh myh-la metila na congdook praap? Me na pha ai? Thlanghing cuih la tah na cuih van mai de cawi ni, tede na cuihna lawng thangvyn ah aka law hamkoi thaihu a ming monih. Laa dawngah, "Lai rui ang awi tangte dykna, a ty botna lawng ng'ke prak ai,' a ti angla, saithaina ng'khyh nawh hingna dawngah heah mah ngaih la khaw khan thil hamla rai thlang. Te dawngah aka tat tlaih nawh aka cak kok Bawipa dawngah pai lah. Na cehna lawngpui te noopcaap langtah na khawleh a cakna ben la te cet lah, (Tahtuk 4:26). Pathen awl lawngah, "Khaw aka pok thai lawng thaihu a nai a naawng, tede thlangngau lawngtah diklai a botna ben to a byh," (Tahtuk 17:24) ti. A thuingaihna tah amah pok ah thaihu boih aka ming angla thaihu a sai phryyp praap, tina ni. He he thawlhna akung la awm. Mah ham byng pokna, ngaihna he thawlhna a phytna la awm. Te dawngah mah hoihkhangna awlpui la pok lak ah Pathen lawng amah kah kamthlahna a sopna ham ng'khyhna ben ah na hoi u ah ni na hoihkhangna a awm lat ai. Te lak ah aka bou on awlpui atlo thaihu na hing khuiah awm thai nawh. Te ni na hing thil hamla aka awm. A dang kah awlpui panga he atheen la tee langtah sai pahoi lah.

1. Namah on namah awlpui la na ngaai u tang tang aw? Oih, na ngaai u hamla awm. Na ngaai u atah na imkhui kaw, na ca na nau, pilnam rangpui on khaw ram hamla hoikhangna aka sai la na awm hamla awm. Maawtkung la na awm nawh cakhaw hoihkhangna aka sai thlaang la na awm ai. Te tila na awm hamla Pathen lawng ng'ngaih. Te tila na awm thaina ham awlpui a tawngna u tah, "na hingna te Pathen ko ni" tite ming langtah a kut dawngah nawn u lah. Pathen na ming nawh tih namah ngaih ah hoihkhangna aka tlap thlaang la na awm atah, langre huhaang ah tuihalh tawnba on kamthlahna ming myhla aka rera, thalrih aka phui thlaang la ni na awm. Patang khang ruila na rera khing cakhaw kamthlahna na pha manawh. Tu ah ti atah thinthah on kawtalh thlaang la na awm. Jesu lawng awlding on ng'khy tih lawngpui theen ah cehpui hamla ng'khy vengah na ngaih nawh. Ka cuih, ka bawi na ti de, na cuih nawh (Awlphawng 3:17). Te dawngah raina, ngaihangna on patangna a pai vengah na lakyng. Na lakyng hamla tyyng. Nang lak ah thaa aka raa ngaai, zouthee-na na saw ah a pai vengah, Samson angla na tharaana boih te haa baat pon. A u lawng m'pai pui tlaih nawh. Te dawngah thaihu na saina rook ah Bawipa ming langtah, te atah, Pathen kah ngaimawngna, thlanghing kah zakmingna boih aka pong volh lawngah Jesu Kri dawngah nang kah thinkaw lungbui te a thlipthung ai, (Filipi 4:7).

2. Na hingna te Pathen kawngaih hingna benla hing lah, khaw sa lah. Pathen kawngaih hingna metila na tawngna ai? Paul lawngah, Muithla dawngah hing u lah, (Kalati 5:16) ti. Metila Muithla dawngah ka hingna thai ai, na ti atah, he he Bawipa tengah bih langtah sai lah. Muithla kah athaih pakow he (Galati 5:22-25). He kah athaih pakow he saw ben kalawng vision angla va phou nawh my. Namah ro ro lawng na sai hamkoi ni. Thlawnna tah Pathen reenna laksawng la awm tih thlanghing kah sai thai koi nawh ni, tede Muithla ah na hing atah athaih te na thaih hamla nang kah sai koi la awm. Ngah ngah sai lah. Tahe kalawng sai pahoi loih ne. Hin at na sai thai cong atah a hin bena tah zoi badai. Te cong kalawng patong patong na sai thai ai. Na sai tlol atah Bawipa tengah thangthui lah. Bawipa m'bawm lah, tila lungbui tang on thangthui lah. Nang bawm hamla Bawipa tah awm zozah. Na sai tlol tih na plong ahkhaw na kaw botsak bol. Bawipa tengah kop kop reenna bih lang thou lah. N'thawh badai. He dawngah ongna theen na taawm thaina u ham thaa van hyyr u lah; thaihu theenna ham cuihna; cuihna ham, pacyng thaina; pacyng thaina ham ngah ngah yh-na; ngah ngah yh thaina ham Pathen kawngaih la awmna; Pathen kawngaih la awmna ham miamanau reen u the-na, miamanau reen u the thaina ham lungna te khyh u lah. He thaihu saithainathli he tare tare na khyh u atah hoikhang myhla, mami Bawipa Jesu Kri mingna benah tula coong myhla na awm u manawh, (2Piter 1:5-8).

3. Saithaina, bibina tu na khyh? Na bibi na khyh te Bawipa tengah nyh lah. Bawipa, he thaihu he nan saisak tih ka ym thlang, ka awmngaih thlang, tila Bawipa tengah nyh lah. Bawipa lawng diklai dawngah na bibina dawng kalawng zoutheenna peek ham a khyhsut pon. Atling la ni na thang de, na thaihu saina dawngah Bawipa te na ym tih yp awm la na sai atah na bibina pungtaai ai. Tede a pyh ngaih (hak kau) thlaang la na awm tih thaihu me ang khaw khyh boih, dang boih hamla na pok praap atah na thlaawng kang ai. Khat khaw tingtaai manawh. Diklai dawngah asan na hing ahkhaw a tawi na hing ahkhaw na hingna te a phu awm hamla Bawipa lawng a ngaih dawngah, a phu na awmna hamkoi bibi te pok heet lang na kaw khuiah hyymna a awmna angla bi lah. Huu la haai la phur phur cu bol. Na kaw khuiah bi hamla, sai hamla hyymna na khyh te sai lah. Tekah na bi on diklai dawng na hing khui ah Bawipa ming thangtheenna na sai thai ai. Hekah bi na bina u he aka vot aka thok Pathen thlaangthli dawmthlaaina ham byng nawh ni, Pathen tengah awmngaihna a coih pawk la tyngsakna la khaw awm bal. Hekah bibina on namami on namami kah pihyn na tyngsak u pon angla, Kri kah awlthang theen awlngaaina on nangmi lawng ongna na tyngsakna u dawngah, te congah nangmikah moihoihna te tethli on thlaangthli tengah na tyngsakna u rang on thlaangthli lawng Pathen te a koh u ai, (2Korinth 9:12-13).

4. Na lungbui pokna, kamthlahna te Pathen ram benah paisak mangkhak. Bawipa lawng thangthuina n'cangsak, 'Na ram va pai hawn seh,' tihe na imkhui kalawng tawng. Na imkhui kaw boih khat khaw haataa myhla, Joshua lawngah, "…kai on ka imkhui kaw lawngtah Pathen bi ni ka bi u ai," (Joshua 24:15b) a ti angla na imkhui kaw te Bawipa ming on paisak lah. Bawipa kah awl te ngaai langtah, te atah Abraham angla na cadil nauha to lawng zoutheen a taawng ai. Bawipa lawng im a sak nawh atah im aka sakung lawng poi oop la ni im a sak, (Saam 127:1) ti te ahawng la ngaai bol. Na cathli aw, nawh atah na imkhui ah Bawipa aka ming nawh a awm atah maawng praap bol. Bawipa dawngah na imkhui kaw boih lum-up la na awm ham ngaithyyn lah. Na imkhui kaw ah Bawipa ram a pai tih Bawipa Ciim Muithla kah maawtna on khawsak hamla thuityn lang cangsak lah. Zu lawh va sakna on thaihu soprep ah na imkhui kaw ah Pathen ming thangtheen la awm hawn seh. … nangmi kah khawbo ramlang te Kri kah awlthang theen on a rop la awmsak uh, (Filipi 1:27). Te congah na khaw khui ah, na ram ah Pathen ram a pai thaina hamla awlthang theen phawngna, mission bibina ben ah thaa pe langtah thuum lah. He he Pathen kah awlpeek ni. Te dawngah cet u langtah namtawm thlaang boih te hubaang la van sai uh, Pa, Capa, Ciim Muithla mingah baptisma van pe uh, kai lawng awl kan peek uthli boih he a vaina u hamla van cang pui uh, (Mathai 28:19,20) Bawipa lawng ti.

5. Na awmna thlangbol khui ah tungpang hamkoi la awm lah. Thlangbol he Kri kah a pum la awm tih a hingna on a lai la awm (Galati 5:25). Te dawngah Kri pum he na lungna ai. Kri pum a roongna ham on a theenna ham thaa na peek popa ai. Metila aka bawmkung la ka awm thai lah ai, tite na pok popa ai. Thlangbol teng kalawng tu hoihkhangna ka dangna lah ai, tila pok hau bol. Bawmna aka dang thlaang he hoihkhang thlaang nawh ni, khawdeng on sading nawh thlaang ni. Khawdeng on sading nawh thlaang la awm ham na ngaih nawh macawi? Thlaang hoihkhang la awm ham, thlaang aka bawmceem ham, thaihu theen sai ham, thlaang aka maawt hamla ni Pathen lawng nang te ng'ngaih. Te tila thlangbol khuiah na awm tih Pathen ming na thang theensak hamla na kamthlah tih na pok hamla awm. Kri thlaangthli on pawlneengna ah awmngaih thathly on pawlneeng popa langtah thlangbol thaa aka pekung la awm lah. Tu ah ti atah, Bawipa kah mik tah diklai pum ah awm tih amah tengah thinkaw aka hal thlaangthli te thaa a raasak, (2Dungtokna 16:9) ti.

A saw kah awl panga hy he tee mailai bol, hawna lah. Pathen tah Muithla on awltak la a awm dawngah awltak on na sai hamla awm (Johan 4:24). Te atah na hingna dawngah kawpok rai Pathen kah saithaina te na huh ai.

.

Aw, Bawipa nang lawng n'ciimsak lah,
Ka thin ka kaw khui ah awmthli he
Kawngaihna on thaihu boih boih
Namah kohna ham ni na sai.

Raipaai angla, raipaai angla, raipaai angla,
Ka moibo van tyngsak lah!
Amen!

----- 000 -----

26 Bukit Sedap Road,Singapore 279924

DIKLAI BAWINA

DIKLAI BAWINA

Uica awng on thi-eek lawng a caak thaina on thlanghyynthli lawng a muk tih a hyn thaina he diklai dawngah na kaawn te van tung u bol. Uica awng on thi-eek lawng a caak thai nawh, thlanghyynthli lawng a muk tih a hyyn thaina nawh vandawng khaw ah na kaawn te van tung u lah. Metitiah na kaawn a awmna ah na lungbui khaw awm van ai (Mathai 6:19-21).
Kri on thawhkop la na awm u pon dawngah, Pathen bantang benah aka ngaawl Kri a awmna, saw ben kah thaihu dawngah na thinkaw te khyh u lah. Diklai thaihu dawngah thinkaw khyh myhla, saw benah aka awm thaihu dawngah na thinkaw te khyh u lah. Na dyk u pon tih, nangmi kah hingna te Kri on Pathen dawngah thuh la awm pon (Kolose 3:1-3).

Diklai bawireng on awmtheenna,

haataana on thailatna ni.

Tede vaan bawirengna tah

dungzaan tola kak tlaih manawh.

( Pathen Thangtheenna Laa No. 242)

Singapore kah mingthang sizung khat la aka awm Mount Elizabeth Hospital la Samuel manu cancer tlawhna tuui hamla August 29, 2007 ah ka pha hih. Sizungah awm hamla a phu a tlawh aih dawngah hotel khat ah ka awm hih. Hotel ahkhaw hin san awm hamla tangka bro nawh a boih ham dawngah im vat hamla khing ka tlap hih. Te vengah America ram kah ka pia khat lawng, 'Holland Road ah aka awm 26 Bukit Sedap ah na awmna ham awm. A phu na peek ngo nawh,' n'tina. Te dawngah te im la ka pawng hih. Im ka pha vengah imkung tah America nam Mr. Scott Douglas zuva la awm. Im thawhka ka pha vengah n'dou tih ng'ym hih. Pathen tengah thangthuina avan khyh. Im khui la n'kuun pui hih tih imkhui te ka byh vengah im bou tangkiik tih akhaanthli bro nawh la awm. TV byhna, buh caakna, buh an thawngna, tuithlukna, tui zouna hyn, internet hawna thaihu soprep boih awm. Kaihih ka awmna akhaan te ka byh bal vengah ihna thah tangkiik, air-conditioner on phone on tuithlukna on thuutna u thaihu biit awm, tih ka awmna hotel lak ah theen ngaai. Imkung lawng, 'Namah hih ngaih la awm hih, thaihu na ngo sarui haw nah, khaw-awk hinaak suk hamkoi boih te he ah khyh, im-awm lawng avan suk badai. Brih ro ro bol, namah im pon ni,' n'tina hih. Ihna himbaai khaw avan thaw popa. Me vengah nym tah buh khaw n'cah hih. Ka awmna im khui ah vaai khaw law nawh tih kamahih ngaih la ka awm thai hih. Bawipa tengah awmngaih cil ka thui hih tih ka ym hih tangkiik. Kamah ngaih la thaihuthli ka hawna hih tih brihna khaw awm tlaih nawh de, ka kaw khuiah thaihu aka awm mangkhak tah, "He he na im nawh ni. He ah po na awm manawh," tila ka lungbui lawng mangkhak avan thui. Ka lungbui lawng avan thui tah Kawlram, Yangon khaw, Insein, 951/C Gone Myint Tharyar lawngpui, Ywamah khawlaw benah aka awm im te ni na im n'tina. Singapore ah ka awmna im he kamah im lak ah theen tih thaihu boih sop pon de, ka im tak nawh dawngah ka kaw khyk ti thai nawh.

Paul lawngah, 'Tahe ng'awmna diklai im he phe la awm cakhaw, kut on sak nawh, Pathen lawng avan khyh vandawngah dungzaan im ng'khyh u, tite m'ming u,' (2Korinth 5:1) tila avan thui. Na pokna lungbui meah a awm? Vaan dawngah aw, nawh atah he diklai dawngah aw? Namah on namah te meben thlaang la na ngaai u? (2Korinth 13:5). Thlanghing a lungna dawngah a hingna te thinglam dawngah mami kah thawlh laiba sahna ham aka pekung vaan on diklai aka saikung, thaihu boih aka mingkung lawng bawina pahih kawng Mathai 6:19-21 dawngah a caih cala avan thui.

1. Diklai bawina hetah kawlkalh hamla ni a awm. 'Thlanghing he huu la haai la aka cet aroh muithlip on ni a lawh hih. Amah pok atah tawk alek van de, zawkka mai ni; kaawn khaw a tung de, u lawng a pang ai, tite ming nawh," (Saam 39:6) tila David lawng avan thui. Te dawngah Kri lawng diklai thaihu dawngah lakyng nawh ham avan thui tih (Mat. 6:31-34), diklai bawina dawngah cuihna khyh hamla avan thui.

Diklai dawngah na kaawn van tung u bol, tila Bawipa lawng avan thui. Tu dawngah? Thlanghing he diklai ko la a awm nawh dawngah diklai thaihu dawngah thin a tlawh hamla awm nawh. Huh nawn thaihu hetah aka auh hamkoi la awm. Aka cak nawh, aka awm po hamkoi nawh ni. Diklai dawng kawlkalh ng'awm khui veng kah hawna ham mai ni. Tede diklai thaihu theen nawh tina nawh ni. Cak nawh, awm po nawh, tila avan thui ni. Aka cak on dungzaan to aka awm rou pang hamla Bawipa lawng ngkhyh dawngah, diklai thaihu dawngah lungbui van khyh bol ti. Diklai dawng nghing khui vengah Bawipa ypna on khaw n'sak atah, atling la n'thang u de, (1Timote 6:7) vaan dawng kah aka saawng bi aka bi nawh vaa pateng khaw Bawipa lawng a pok pe atah mami hamla lakyng ham awm nawh, ti. Tangka ngaih aihna he thawlhna a pungna la lat awm (1Tim. 6:10) tih pungthuikung lawngkhaw, khawling huiah patang palai la bi ka bi he ka thiina, tuah ti atah kai lawng ka ceh taak atah ka hu kah thlaang ham ni ka ceh taak khong (Ekklesiastes 2:18) ti. Pok myhla, thlanghing he pilnam tiim kalawng auh vilvak thai tihe ming hamla awm, bawi la aka ngaai u tih aka ook u thlaang Pathen haai ah tula khaw awm nawh (Luka 12:20,21)tila Bawipa lawng ngaithyynna awl avan thui.

2. Vandawng khaw ah na kaawn te van tung u lah. Kri lawngah vaan dawngah na kaawn tung u lah, tila cuihna awlhyp a van thui he, tu dawngah kai. Diklai thaihu he ngaih u ro ro bol, tina kai aw? Nawh ni, ti nawh. Diklai dawng na awm vengah na dungzaan im ah na hawna hamkoi kaawn tlapna lawngpui ni avan thui. Thlaang lawng diklai pum he khyh mai cakhaw a hingna te a thlaawng atah aphu n'tu aka awm? A hingna te n'tu on a thaw thai ai? (Mat. 16:26) ti. Hingna n'thlaawng paai kawinih, bahau la, vawvaa la awm paai ai ta. Hingna a awm tlaih nawh atah n'tu aka awm tlaih ai. Tahe ah vandawng rou te nghu thlan pai de, aka awm hamkoi vandawng rou te ongna mik on boih nghuh thai (Hebrai 11). Aka pawci thai nawh rou ng'khyhna vaan benla thinkaw te ng'khyh hamla awm. Huh nawn thaihu dawngah n'cet nawh tih huh nawh thaihu awm kheng ti Muithla mingsakna rang on m'ming, ng'ong thaihu dawngah ni n'ceh u (2Korinth 5:7). Diklai thlanghing lawng pateng khaw thaihu a huh tangte te ong ree tlaih nawh. A huh pon dawngah ong khaw ngo tlaih nawh. Huh nawn byng he m'vai kawinih thlanghing aka roong nawh kok la ng'awm ai. Tu ah ti atah thlaang kah tangte huh byng te ni n'lamtoon vetih m'vai pon ai. Huh nawn byng n'lamtoon kawinih aka haataa hamkoi la ni, ng'awm ai. Sengcamo lawng degree a huh ham te a huh a dang dengah sengim kai kawinih metila a coongna ai? Te dawngah Tahtuk Awlcuih lawng, 'Mengteng kamthlahna aka khyh nawh thlaang pal,' a ti laawt. Tu dawngah a pal? A dang hamkoi thaihu te ongna mik on a dan a huh nawh dawngah kamthlahna khyh nawh. Kamthlahna a awm nawh atah u lawng bi bi nawh. Tahtuk Awl lawng, "Hailam thaihu huh doonna a awm nawh atah, thlaang lawng yh thaina khyh nawh," (29:18) ti.

Pathen cathli lawngtah Ciim Muithla maawtna rang on hin rook khawsakna dawngah cuihna a khyh u. A lungbui thinkaw boih te Bawipa awmna Ciim Muithla tempul la a hawna u (1Korinth 6:19). Ongna ngaiyypna on hailam ben te a dan u. Hailam ben byng a dan u dawngah tahe kah thaihuthli tula sak u nawh, tina nawh ni. Tahe kah thaihuthli boih he Bawipa lawng tahe kah hawna hamla m'peek a ti dawngah a ym u tih awmngaih ruila a hawna u. Tede hing thil aih nawh. Habakkuk angla, khyh ahkhaw khyh nawh ahkhaw Bawipa amah lawng m'peek atah awmngaihna a khyh u tong tong (Habakkuk 3:17-18). Thaihu soprep dawngah hingna lawng a ming u (Filipi 4:11-13). Ongna khyh myh la Pathen cathli mingna nawh, ongna awm myhla thaihu sai mailai he ngauna a tyngna khong la awm tih Paul lawng tah thawlhna ti (Rom 14:23b). Lamha la ka thui pon angla, Joba on Paul lawng a thui angla, diklai dawngah a u khaw kaawn on tangka on thang haih nawh. Pathen lawng a hing khui hawna hamla tangka on kaawn a peek, tede dungzaan hawna ham pe nawh. A ceh taak ai. Ahih hu ah aka law thlaang hamla patong a ceh taak ai. A u lawng a hawna ti pateng khaw ming tlaih manawh. A hing khui ham byng la Pathen lawng a peek de, amah kah thaihu van ro ro angla a pok tih thaihu dawng teah a hingna aka khyh thlaang tah ramsa, suvaa hingna on a langna awm nawh. Pathen te ming tlaih nawh. Pathen ming, Krica, thlangbol ti pateng khaw zaak ham ngaih nawh. Paha pakhat a peek ham tare tah thui tlaih bol. Te ang thlaang te ' A kaw aka awm nawh thlangngau,' tila Bawipa lawng avan thui (Luka 12:20). Amah pok atah bawi la, thlangcuih la ngaai u de aka cuih nawh thlangngau la ni a awm. Thuina maiah, tekah bawi lawng khawdeng thlaang khat te a reen tangkiik tih im lou thaihuthli on tangka phaisa a peek. Tede te thlaang lawng aka pekung bawi tengah ym cil khaw thui nawh, awmngaihna khaw tyngsak nawh. A tengah vaai khaw cet nawh tih kamah lawng ka huh ka dang van ro ni, titih hool u kawinih ahih aka reenkung bawi lawng te tila a awm te ming tih hu kawinih, metila te thlaang te a tina ai? Ym nawh my nizaw? A tol zozah pon ai. Te tih angla ni, diklai bawina aka ypna tih aka hool uthli boih he Pathen haai ah a awm. Te dawngah nawh aw, thlangngau, a mingna laawt.

Thui tang tang atah zoutheenna pekung Pathen tengah awmngaih cil aka thui tih diklai dawng a awm khui vengah a hawna thaihu dawngah Pathen tengah ymna aka khyh thlaangthli he thlaang hoikhang on thlanglen la boih awm u. Ka awl he na ngaai tih ka awlpeek he na vai u atah na cadil nauha thawngsang tola zoutheen na dawng u ai (Deuteronomy 6), tila Pathen lawng a thlangtyk Israel cathli tengah a thui pe. Kri thlaangthli he Israel thai, olive thing dawngah a cawng haih (Rom 11:11-21) la ng'awm u pon. Pathen imkhui kaw khat la ng'awm u. Te dawngah Pathen awl te ongca mami hamla awm tong tong hyn.

Te dawngah, vaan bawilenna on lai bawilenna akung tah vaan dawngah aka awm mami na Pa Pathen ni. Pathen awl angla a kawngaihna angla diklai bawina te a ming bawilen thangtheenna ham ng'hawna tih awmngaih cil n'thui popa atah na cehna lawngpui manthui tare ai. Vaan dawngah rou na tung la khaw awm bal. Tede zoutheen pekung Pathen te ming myhla diklai bawina ro ro te na hing thil atah, ming doon thai la aka awm nawh na hingna a bot cong atah na kaawn on na thaihu khaw boih na ceh taak vetih thlaang lawng ni a pang khong pon ai. Te nawh aw Phungthuikung lawng, Patang palai la bi ka bi khaw ka thii-na, ka dyk cong atah thlaang ham ni ka ceh taak khong ai,' (Ekklesiastes 2:17-18) a ti laawt.

N'thaihu a awmna dungzaan Bawipa on ng'awm haihna hamkoiVaan ben la thinkaw khyh u silang, diklai dawng ng'hing khui ahBawipa ming thangtheenna ham Bawipa kah zoutheen peek heAwmngaih cil thuina, ym cil thuina on hawna u sih. Amen!

----- 000 -----

December 6, 2007 26 Bukit Sedap Road Singapore 279924

SYKHALH-NA TAANA

SYKHALH-NA TAANA

Thlanghing tengah aka law nook nawh sykhalhna te nangmi tengah a law monih. Pathen tah a yp awm: ahih lawng na yh lek thai nawh te sykna te na saw ah paisak manawh. Sykhalhna na taawng mai bal cakhaw, sykna huui ah na pai thaina ham ahih lawng lawngpui avan rok ai, (1Korinth 10:13).

Thaihu thee te olh lah, te atah na teng kalawng heng badai. Pathen tengah zooi lah, te atah nang tengah ahih te zooi van ai, (Jakob 4:7,8).

1973 kum hin at atah ka mia lawng awkngal a kah tih avyn hin ah sana thuih hamla ka cet u. Awkngal khaw nauh pon de, sana la a awm dawngah a tengah azooi la ceh hamla a rih awm tangkiik. Awk ngal te a thlaak a thlaak u tih a hu la tah tuiva la put cungpung. Tui dawng a zuun thuk vengah ralvaang ah lou aka phou hutathli lawng tui dawngah aka zuun thuk awk ngal te a huh u. Te vengah Pa Im Teng (thlangthii) lawng lumpawk a pawm tih langdaai kalawng a mah. Awkngal lan la puk a cuuk hang vengah langdaai kalawng Pa Im Teng lawng kyng a kah van de, a yn tlung saw ah pawn a kah tih awk ngal lawng Pa Im Teng te lat a thlaak. Te vengah lou ah aka awm hutathli lawng angaih la paang u tih, "Awi Tyyp napa heng , heng, heng," tila a ngaih thlang la a dook thuk u. Pa Im Teng khaw alola la heng tih lan louha sa la phaat avan heng taak. Louha sa avan pha vengah awkngal lawng a mel taak.

Pa Im Teng tu dawngah awkngal lawng a ngeh thai nawh? Pakhatna ah awkngal tah bongha a ka ca te la awm pon dawngah khalaa tlaih nawh. A pahihna ah Pa Im Teng lawng a heng taak. Pathen cathli sykna kalawng a loihna on a taana tah hetila ni a awm van. Awkngal angla Seitan tah bongha caak tangte la awm pon. Kalvari ah a luu neet la awm pon (Genesis 3:15). Tede bongha caak ruila khaw Pathen cathli metila ka dolhna lah ai, titih sandeih angla kaawk ruila Pathen cathli te a mee tong tong, (1Piter 5:8). Te dawngah na cehna lawngpui te noopcaap langtah na khawleh a cakna ben ah te cet lah; banvoi bantang benla nawng bol, a thee benla na khaw te kaan bol (Tahtuk 4:26,27). Tu ah ti atah thlangdong kah lawngpui lawngtah thaihu thee te a reel (Tahtuk 16:17a). Thlawnna ben thui tlaih myhla thlawn te cathli sykna khui ah a tlaakna nawh hamla, sykhalhna taana hamla Pathen cathli lawng n'sai hamkoi pali aka awm Baibul lawng avan thui he byh u lah sih.

1. David Sengpahrang lawng, Aphu aka awm nawh thaihu benla ka mik rawi he daisak bol lang; na awl angla ka mik rawi he khom lah, (Saam 119:37) tila Bawipa tengah thangthui. Huhna, zaakna, pokna, ngaihna, mingna lawng hin rook ah thlanghing he a maawt. N'thaihu ngaihna a awmna benla kawpok lawng n'ceh pui. Tekah pokna lawng thlanghing te a taa atah a pokna ben la hing. Te dawngah thlanghing aka taakung thaihu te ahih kah bawi la awm (2Piter 2:19b). Pokna a zahawh atah m'pokna lawng zahawh n'taa van. Thlaang kah a haam ke na byh atah namah khaw puu na haam van nizaw? Awl on thui kaa de, lungbui pokna lawng a thui awl te a vai nawh atah a pokna ben la ni kop kop mel. Hin at ah Nu Helen lawng Samin khaw kah a paai mu im tengah a heh tih mezoh nym a awm congah Samin la kop a voi taak. Kop a law bal veng atah a canu Julia haih avan law pui. Julia te kum li law ca khong. Te vengah thlemvaai veng kah apaai mu a heh te pou tih a paai pateng mym kang tih phyrh tawm ca boih pon. Ym tangkiik ruila a canu Julia a khy tih, 'Tami, byh lah he, kai lawng a paai ka heh te tahe kop paai tawm pon he,' a tina. A canu lawng a byh van tih a ym hih tangkiik. A byh hih cong tih a ceh taak tawm atah, a canu nala, "Tami, a paai he sik bol be," a tina. Te congah cet hih. Tede a manu a ceh cong khongah, a canu Julia te kop mel tih a paai mym te khat khaw thlung tlaih myh la biit a sih. Thleem ben ah a paai te a manu lawng a byh kop bal vengah khat khaw awm tlaih nawh. A u lawng a sih, tila a doot vengah a canu lawng a sih tite a ming. A thinsa tangkiik ruila a canu te a bawh. Avan thui u vengah ka nui ka nui u. Tu dawngah Julia lawng a manu lawng a thui pe lal lal ah apaai biit a sih? Camo la a awm dawngah aw? Oih, tekhaw a sogna awm. Tede te lak ah aka song ngaai tah, apaai pokna, sih hamla ngaihna te atlo thaihu pokna lawng a thaw pe nawh dawngah ni. A manu lawng tekah apaai kawng pokna lak ah camo lawng a ngaih ngaai atlo pokna a kaw khuiah poksak kawinih, metyk ahkhaw apaai te sik nawh my. }} Sykna me kalawng a law ti atah lungbui ngaih pokna dawng kalawng ni a law. Lungbui he thlanghing aka maawtkung la awm tih Seitan lawng huur hamla a ngaih. Tede he he pok lah: "Nangmi he namami ko la na awm u monih, nangmi tah aphu on lai la na awm u pon dawngah na pum on Pathen te thangpawm u lah," (1Korinth 6:19). Pathen ko la na awm pon dawngah athee thaihu me ang pokna lawngkhaw na lungbui a van huur vengah heng taak. Na thinkaw khui ah pokna theen nawh a awm lii veng teah pokna aka theen on thaw tlengtlap praap. Bawipa kah awltak pokna on atlo kawpok theen on na kawpok te thaw lah. Thaihu theen nawh lawng n'taa bol seh, thaihu theen on thaihu theen nawh te taa lah, (Rom 12:21). Jesu te na thinkaw mik on byh lang pok mangkhak lah, (Hebrai 3:1). Bawipa Jesu te pok zozah langtah, (2Timote 2:8), … aka song boih, thangpawm koi boih, aka thym boih, aka ciim boih, lungna aka kap boih, nai hamkoi boih, n'tu khaw aka theen tih koh ham tyyngthli boih – te ang thaihuthli te van pok uh, (Filip 4: 8). Thaihu theen nawh pokna lawng lungbui a caak tih pawcina benla a maawt. Awl hawng on 'rih bol ne,' n'ti vengah, rih na zahawh a awmsak lat. Thlaang saw ah kawlawna nawh kawng pok vengah ihmyh lawhnai la ng'awm tare. Te te Seitan kah sykna lawngpui theen kok pon ni. Kri thlaang Pathen cathli la ng'awm u dawngah, sykhalhna a law vengah Kri saithaina on a bawilenna pok tih thawlhna te taa hamla awm. Te atah thawlh sykna te heng badai. Na heng taak atah na loih ai, sykna te na taa pon! Zou Sep angla sykna te heng taak. (Pa Im Teng khaw a heng dawngah loih).
2. A pabe sykhalhna taana lawngpui tah Pathen cathli tengah na raina on sykhalh na taawngna te phawng, thui pelah. Pathen cathli he amah byng awm thai nawh. Bawipa lawng Pathen cathli thik at la a khyhna hetah athee atheen minghaih awmngaih haih, kawthee haih hamla ni. Baibul lawng he tila avan thui: Pahih tah pakhat lak ah theen bet,… dawmthlaaikung khyh myhla aka tlim thlaang tah a reen ham awm; Amah byng aka awm tetah thlaang lawng a piaawk mai suide, pahih rawi tah huur ahih thai, rui pathum m'veh atah zy pat nawh, (Ecclessiastes 4:9, 12) ti. Pathen lawng hyn theen kok Eden ah Adam a khyh congah pateng khaw amah byng awm te theen nawh, ti tih Evi a sai pe atah, he diklai thawlh ralrih awmna ram tare atah Pathen cathli ruun u thee tih thaa lawh haih tare hamla awm. Raina, sykhalhna on patangna a law vengah ongcathli te pyn tih rangpui la Bawipa tengah thangthui pui hamla awm. Bawipa lawngah: Raina na taawng hin vengah ng'khy lah; kai lawng kan loihsak vetih, te atah kai te nan thangpawm ai, (Saam 50:15) ti. Khat on khat Bawipa ming ah pawlneeng u tih khat on khat saw ah khawdawp ngaaina on khat on khat hamla thangthui u hamla awm (Jakop 5:16). N'raina, bongha angla pum dawngah n'caak u te thuh khak myhla, thui, phawng tih tuui hamla awm. Bongha thuhkhak tih tuui myhla a awm atah ahu la te bongha lawng raina abou ngaai m'peek thai. Seitan lawng atah na thawlhna, na raina te phawng nawh hamla, zahrau zahdeng la m'poksak ai. Tede awltak Baibul lawng avan thui tah, aka thawlh nawh u ca khat khaw awm nawh (Rom 3:23) tila avan thui tih, thawlh sykna raal aka tuk boih la ni ng'awm u (1Korinth 10:13) ti. Thawlhna, raina, sykhalhna n'taawng vengah Pathen haaiah phawng myhla, ongcathli tengah pyn myhla awmna hetah mah on mah aka song kok la ngaaina u, nawh atah, zahrau thaihu la Seitan lawng poksakna dawngah ni. Pathen haai ah dungvong la ng'awm thai nawh dawngah mah kah ahyp thaihu thawlhna te thui hamla n'rih. Thui myhla a san na khyh atah te lawng ng'ngawn ai. Bawipa awl lawngah, 'Aka ook u te Pathen lawng a olh tih, dungvong la aka awmthli tengah reenna a peek,' (Jakop 4:6) ti. Sykhalhna na taawng vengah ongcathli on bawm u langtah tuk lah. (Pa Im Teng khaw lou kah thlaangthli lawng heng hamla a dook u tih te ni a heng van.)
3. A pathumna sykhalhna taana lawngpui tah, Raai te na tuk van hamla ni. Raai te na tuk atah na teng kalawng heng ai (Jakop 4:7). Diklai dawng kah ongca Pathen thlaangthli boih he raal aka tuk li la ng'awm u. Laa dawngah, 'Raltukna on kawthee-na, tuiphu angla thou cakhaw; Jesu rang on u lawng nym n'taa tang ai," (Pathen Thangtheenna laa, No. 271) tila n'sak angla seitan raal boih n'tuk u. Metila seitan raal te n'tukna ai? Lamha la ming ham aka awm tah Pathen ca la ng'awm pon dawngah Seitan lawng amah ngaih angla ng'hawna thai nawh, ti he ming hamla awm. Tede, na thinkaw lungbui ahong la a awm atah, sykna te a lawsak. Namah kawngaihna, na imkhui ah raina, na pui na paw on aw, nawh atah na ngona soprep te aty theen la a lawh vetih, 'te tila sai saw, theen ai ta,' tila na kaw khuiah a lawsak ai. Tede Pathen cathli lawng tah Pathen awl on tekah sykhalhna awl te nyhtah hamla awm. Paul lawng Seitan raal tukna phawlip a thui te muk lah. 'Seitan kah kamthlahna te na khoongna u thai hamla Pathen kah phawlip cungkym on thokcau u lah,' ti, (Efesa 6:11). Thlawnna thii lumyk te myk u lang, Pathen Awltak muithla samsen te pawm u lah, (Efe. 6:17) ti. Pathen awl on Seitan kah zookna te daam hamla awm. Metila n'daamna ai? Bawipa Jesu amah lawng dan ham, oot hamkoi avan sai pon (Mathai 4:1-11). He awl he tee delah. Pathen awl on Seitan kah pala alh te daam lah. Pathen awl tah a thaa a raa dawngah (Hebrai 4:12), Seitan lawng a rih. Na kaa ro ro on Pathen awl te pahoi pahoi thui langtah Seitan te ongna phring on dee lah. Heng badai. Heng kheng kheng ai, dee mah dee lah. Namah thaa on Seitan te taa hamla kamthlah bol. Sandeih aka kaawk te namah thaa on taa hamla kamthlah bol. Na taa nawh my, ng'ngeh zozah ai. Lumpawk on na kah ah ni a song ai. Lumpawk tah Pathen Cabu ni. Tede na kaw khuiah Pathen awl caryp na khyh dengah ni (Kolosa 3:16) Seitan te na kah thai hyn bal ai. Matu ram ah lumpawk athai pai pawk pon. Lai van langtah caryp khaw khyh lah. Rap dawngah lumpawk khyh sut tih caryp aka awm nawh angla, Baibul tah awm pon de, na tee nawh, na kaw khuiah na khyh nawh atah seitan raal na taa thai manawh. Pathen awl te kym langtah hawnah. He he Seitan sykhalhna taana lawngpui ni. Pathen Awl caryp on Seitan te kaap lah. A tal lungah na kah phek vetih Goliath angla tlim kyng congah a rawn pateng khaw Pathen awl samsen on na tlok thai ai.
4. Namah on namah yp u bol lang Bawipa thaa ypna lah. Namah on namah te kai he Bawipa kah ni, tila ming lang, thui popa lah. Na thinkaw boih on Bawipa te ypna lang, namah kah mingna dawngah hangdang u bol. Na ceh na awmna rook amah te ming lah, te atah na lawngpui avan dongsak ai, (Tahtuk 3:5-6) tila Bawipa awl lawng avan thui. Ka ming pon ta a! Ka taa badai, coong badai, tila namah kah pokna mailai dawng hangdang u bol. Bawipa awltak nawh atah mah lungbui he khaw ypna ham awm nawh. Tu ah ti atah thinkaw he zakming thai lek nawh tola thailat aka raa la awm (Jeremiah 17:9) tila Pathen awl lawng avan thui. Te dawngah, ka taa thai badai, ti langtah, thaihu theen nawh saina ah, awl theen nawh thuina ah ngah ngah awm bol, vik ceh taak. Ka yh thai badai, ti bol. Te ang thaihuthli te reel lah. Thlangcuih lawngtah Bawipa te a rih tih thaihu theen nawh te a heng taak; tede thlangngau lawngtah pokna khyh myh la praap praap a muk, (Tahtuk 14:16) tihe ming ham awm.

Hekah sykhalhna raal taana lawngpui pali he hawna lah. Te atah Seitan raal, sylkhalhna na taa thai pon ai.

Dyk tola yp awm la awm lah, hingna bawi lumyk te kan peek ai, (Awlphawng 2:10b).
Bawipa Lawng He Awl aka teethli boih sawah Seitan saw ah taana pe hawn seh.
Amen!

----- 000 -----

(November 29, 2007) 26 Bukit Sedap Road, Singapore 279924

KRI ANGLA SAI LA NG'AWM U

KRI ANGLA SAI LA NG'AWM U

… amah on voh voh n'lou u tih Muithla la aka awm Bawipa teng kah bawilenna on voh voh m'be u. (2Korinth 3:18b)

.

Pathen lawng Eden dum ah thlanghing (nang) n'sai vengah Pathen amah kah mui on aka lou la n'sai (Genesis 1:27). Jesu Kri angla, Kri on aka lou u la n'sai. Awlpui tangkiik la n'sai dawngah Pathum Pakhat (trinity) Pathen doot u the, ' mami angla aka awm thlanghing sai u sih' (Genesis 1:26) ti. Ramsa boih on n'lawhna u nawh tah Pathen lawng amah muithla te nghingna dawngah m'peek. Thlanghing he Pathen lawng a sai vengah thaihu pahih on a sai, pum on muithla on a sai. Takbawl a sai tih hingna muithla a peek. Te kalawng thlanghing la coong. Pum he diklai la mel kop vetih a muithla m'peek hetah Pathen amah tengla mel kop ai (Ekklesiastes 12:7) tila awlphawngkung lawng a thui. Pathen lawng thlanghing a sai te seitan lawng a phe vengah, thlanghing kop atheenna hamla vaan celtuihthli a ceel tih tlaihsak kop nawh. Amah ro ro lawng patang a khang tih a soutui thisen la a laawng tola thangthui, thisen a laawngsak tih dykna te dykna van on kop n'tlang. Thawlh phu dykna (Rom 6:23) selkhui thawhka te a phee tih dykna on thawlhna raal te pheng avan taa. Te dawngah Paul lawng thawlh thara saithaina dykna te, Aw dykna, na taana mela a awm? Aw dykna na syy mela a awm? …. Mami Bawipa Jesu Kri rang on taana te mami tengah m'peek pon,' (Rom 15: 55, 57) tila dykna phyl ziin te a dook.

.

Pathen on aka lou uthli boih tah Pathen cathli la awm u. Pathen casak, thang kop cathli la awm u. Amami lawngkhaw Pathen ca la a awmna te a ming u. Paul lawngah, 'nangmi pum tah Kri amah kah a beekthli ni tite na ming u nawh aw? Te dawngah u khaw Kri on aka tawm u tah muithla ah pum khat la awm hih,' (Korinth 6:15, 17) ti. Tekah mingna tetah Pathen Muithla Ciim lawng a mingsak (1Korinth 2:10-16). Ciim Muithla rang byng on ni thlaang lawng Jesu tah ka Bawipa, ka thlawnkung a ti thai (1Korinth 12:6b). A u khaw Pathen Ciim Muithla aka khyh nawh thlaang tah Pathen thlaang nawh ni, tila Paul lawng avan thui bal. Te dawngah Kri angla awmna hetah Muithla dawngah hingna he ni. Muithla dawngah hingna metila ka mingna ai, na ti thai. Thlaang khatsut lawngtah Muithla baptisma huh hamla awm, nawh atah ming nawh awl cal hamla awm, tila a pok u. Tede ming nawh awl tah kutdou laksawng khat la awm, tih baptisma tihe khaw muithla on hingna heni a thui. Mah pokna on thlaang lawng sai hamkoi thahu nawh ni. Te atah Muithla hingna he metila a tyngna? Laamna on aw? Huhsakna vision mingna aw, nawh atah tawngha awl thuina aw? He angthli boih he Pathen awl on aka roong tih awltak mingna ah aka haam thlaangthli hamla theen tangkiik suide, Pathen awl aka tee vaai nawh, ongna lawngpui aka zakming heet nawh thlaangthli hamla seitan a rawlhna u aka zoi kok lawngpui la awm lat thai. Kawpokrai saithaina sarui he Pathen muithla ben kah boih nawh ni. Tawngha rawlthli lawng thaihu kawpokrai a sai thai u, tite Baibul dawngah ng'huh. Bawipa Jesu lawng lungtou buh la seitan kah awlpeekna rang on sai nawh, (Mathai 4:1-4).

.

Khaw khat ah ongca khat tah toom tum tih paang ruila, Haleluiah! Amen! thuina ben ah a u lawng pha tlaih nawh. Kamah byng lawng Haleluiah tihe ka thui ai, ti angla a pok. Im atah tlungthang tih a va a ca kah awlthui tula sak nawh. Ciim Muithla na khyh u monih, na ming u monih, kang a tina. A va a cathli lawngkhaw ahih kah thui te tu la sak van nawh. Pathen cathli aka maawtkung, lawngpui aka thy pekung hoithoi Pathen Awl (Saam 119:105) hutuung myhla mah lungbui pokna, hy ngaihna on lawngpui n'ceh vengah lawngpui hang hamla zoi ca. Te vengah seitan lawng azooi cala a maawt thai pon. Lawngpui nyh-kung map a awm nawh atah thlaang lawng lawgpui a hang popa.

.

Te atah Pathen awl lawng Muithla thlaang, Kri hingna aka khyh kah moibo metila avan thuina? Metila Muithla ah nghingna ai? Galati 5:16-25 awl he tee lah. He awl khuiah Muithla thlaang ni tite ming thaina a tyngna awl tah aziit 22 -23a heni. Tede Muithla thaih tah lungna, awmngaihna, ngaimaawngna, yh thaina, reenna, theenna, yp-awmna, kawdawna on pacyngna he ni. Hekah Muithla thaih pakow hyhe na hingna dawngah a tyng nawh atah, Muithla ah na hing nawh, tite ming hamla awm. Tu ah ti atah Bawipa lawng he tila thui: Ahimi te a thaih ah na nok u badai. U lawngah athliing thing dawng kalawng misur thaih a bit nook tih, thlingdum dawng kalawng thaidut thaih a bit nook? Thing theen dawng kalawng athaih theen thaih tih, thing thee dawng kalawng a thaih thee thaih van. Thing theen dawngah athaih aka thee thaih nawh tih, thing thee dawng kalawng a thaih theen thaih thai van bal nawh (Mathai 7:16-18) ti. A sop bir la thaihu sai thaina ka thui ngaihna nawh, a u khaw thlanghing aka sop awm nawh (Filipi 3:12) tite Baibul lawngkhaw avan thui. Diklai haan ah thawlh seitan raal on n'tuk u popa dawngah sopna hyn m'pha thlan hyn. He muithla thaih pakow hy he thuicaih hamla bro nawh san ai. He ah n'thui thai boih manawh. Tede he hingna he na lungbui ah a awm atah hin rook na hingna dawngah patang khang on khawdeng thlaang la na awm mai cakhaw, aka dyk thai na pum dawng teah Kri kah hingna te tyng ai. Paul lawngah, Te dawngah ka thaa thee u nawh, pumsa atah ka patang u de, ka thinkaw khui atah hin at cong hin at athai la patong patong ka awm u, Metitiah aka zaang ca on kawlkalh patang khangna he ka dang hamkoi dungzaan bawilenna on ka nyhtah vengah tula khaw thuum nawh nawh, (2Korinth 4:16-18) ti. Pumsa ben atah Paul he bro nawh la thlanglen la awm van de, Kri Muithla on a hing cong atah, ..ka hoihkhangna boih boih te Kri dawngah tahe tah ka thlaawng kang pon. Thaihu ka thlaawngthli boih lak ah ka Bawipa Jesu mingna te bou ngaai, ahih dawngah thaihuthli boih boih te ka thlaawng kang. Te angthli te boih baai lani ka pok pon, (Filipi 3:7-8) ti. Te dawngah, Muithla on m'be-na tah a tyngna ham Muithla tharana on Muithla thaih te tyngsak hamla a ngo. Kri thlaang, Kri on aka lou u tah amah hamla hing tlaih nawh tih Kri bawilenna ham ni a hing pon. Kai hamla ka hingna he Kri ni, ka dyk cakhaw hoihkhangna ni (Filipi 1:21). Mah hoihkhangna ham, mah kawngaih khyk a tina ham, thinkhyk kawdeeng la laamna he tlaih nawh tih, pumsa ben ah patang cakhaw Kri hingna te thlaang hoihkhangna hamla mami pum dawngah a tyng atah, te te Kri on lawhna u la awm.

.

Kri kah a coongna te Paul lawng he tila a phawng:

Ahih tetah a coongna dawngah Pathen la awm de
Pathen on a van la a awmna te phoih hamla pok nawh.
Amah on amah te tula khaw pok u myhla,
Tuihzoih kah paihyn te a huur congah,
Thlanghing angla te va sai u.
Thlanghing khat angla awm van tih, dungvong la a awm congah,
Dyk tola awl a ngaai tih thinglam dawng ah dyk.
Te dawngah Pathen lawng ahih te sawsaang kok ah a khyh tih
Ming boih boih saw ah aka awm ming te a peek.
Jesu kah ming dawngah
Vaan on diklai on diklai dang kah
Tunkhuuk boih lawng cyngkyng tih
Pa Pathen bawilenna ham on
Lai boih lawng Jesu Kri tah Bawi ni tite
A phawngna hamla ni.
( Filipi 2:6-11)

.

He hingna he na hingna thai hamla Bawipa tengah thangthui langtah tharana lou lah.

Te dawngah nangmi boih lawng aka song nawh thaihu te na dul u tih na teng vaai
kah thlaang tengah awl song te na thui u hamla awm. Mami he pum khat kah a beek la ng'awm u. Na thinsa-na dawngah thawlh bol: na thinsa ruila khaw van leuhsak bol, seitan te a paihyn van pe u bol. Aka hyyn nook lawng hyyn tlaih bol seh, bibi selang a ka votthok thlaangthli te a dawmthlaai thaina ham amah kut ro on amah ham hoihkhangna thaihu te sai seh. Na kaa khui kalawng awlthee thongsak bol, tede thlangtlo kah a ngo-na ham aka hoikhang hamkoi awl te thui lah. Te ah ni aka hutuungthli ham hoihkhangna a awm ai. Pathen kah Ciim Muithla te kaw theesak u bol. Ahih on ni thlawnna hin hamla nangmi he nokna deng thil la na awm u. Thii-na, thinbon thinsa-na, tengna, awlthee thuina on thlaang saw ah me ang athee pokna khaw tong u loih. Khat on khat saw ah reenna van khyh u lang Kri dawngah Pathen lawng nangmi khawdawp ng'ngaai u angla nangmi khat on khat khawdawp ngaai u lah.
(Efesa 4:25-32)

.

Kri angla hing ham on Kri khuiah Muithla rang on na hingna hamla diklai sing nupa phung te hoot langtah (Rom 12:2) Kri dawngah a thai la saipan la na awmna ham (2Korinth 5:17) Pathen Ciim Muithla lawng ng'awm pui hawn seh. Amen!

----- 000 -----

November 25, 2007, Singapore

Pathen on Pia la Awmna

Pathen on Pia la Awmna

Tuihzoihthli kan tina u tlaih manawh. Tuihzoih lawngtah a bawipa kah bibi te ming nawh. Te dawngah kai lawng ka piathli kan tina u pon. (Johan 15:15)

Bawipa lawng amah aka rihthli tengah a paipii te ahyp la dyym a mingsak. (Saam 25:14)

...

Pathen on pia la awmna, n'thui thlan ah dootna khyh de lah sih. Pathen on pia la awm ham na ngaih tang tang aw? Pathen lawngtah nang te pia tila khy ham a thui pon. Awlkhyh Rym Pathen awl dawngah a uthli Pathen on pia la aka awm? Mousi, Abraham, David, Enok, Joba, on Noah mi he Pathen on pia la awm u. Pia la awm u tih Pathen te hinzahna on a rih u. Metila pia la a awm u kai? A dang kah angla na awm atah nang khaw Pathen on pia la na awm van ai.

1. Hin rook na hing khawsakna on na thaihu saina rook ah Pathen rang on ni ka sai thai, tite ming langtah na kaw khui ah amah te ym popa lah. Paul lawngah 'Bot ouhla thangthui uh,' (1Thes. 5:17) a ti he, me hyn on me ang thaihu saina ah khaw a tengah ymna on awmngaihna thinkaw khuiah na khyh popa tih na kaa on awltyym la khaw, 'Bawipa ka tengah na awm zozah dawngah ka awmngaih,' nawh atah, 'na reenna ka ym,' nawh atah 'nang ni kan ypna,' nawh atah, 'Bawipa na ko la ka awm,' nawh atah, 'nang tah ka Pathen ni,' nawh atah, 'na ming ka thangtheensak,' tila thangthuina khyh popa lah. Asan thlang thangthuina nawh ni. A tawica la thangthui langtah, thaihu na saina rook on me hyn ahkhaw na awmna rook ah te tila thui lah. Te tila na thuina tetah Pathen ka tengah awm zozah tite na mingna ni. Thlanghing thinkaw he diklai thaihu pokna dawngah vik vik a auh thai dawngah, te tila na thuina rang on na lungbui khuiah Bawipa on ka awm haih tite na ming vetih na ngai a maawng congah awmngaihna na khyh ai. Na lungbui on bot myhla Pathen na pok thaina popa hamla te tila na sai ai. Te atah 'tuikeeng kah thingling a ram saihiim popa tih a zung aka cak thing' (Saam 1:2,3) la na awm ai. Te te lungbui on muithla on Pathen na bawkna la khaw awm bal (Johan 4:24). Na ceh na awmna rook ah amah te ming lah, te atah na lawngpui te a van dongsak ai (Tahtuk 3:6). Te tila na awm atah Pathen on pia la na awm hih pon.
2. A pabena atah Pathen awl te na lungbui ah pok langtah amah on pawlneeng lah. Hin rook ah Pathen awl tee hamla awm de, a lawlhna awm tih na tee thai nawh ty vengah a awl te pok lah. Joba on David lawng Pathen awl a pok hih popa dawngah Pathen pia tila a khy u. Joba lawng, 'Hin rook ka buh ka an lak ah a kaa khui kah awl te ka thintlawhna bet (Joba 23:12) ti; David lawng, 'Aw, nan cangsakna awl te ka lungna thlang mah aw, hin at pyr typ typ ka pok khing (119:97), ti. Baibul awl na tee tih Pathen awl na lungbui khui ah na pok vengah na hingna dawngah a tak la haw nah. Ming hawng ming he hawna nawh atah aphu awm nawh.
3. Na kaw khui ah, na hingna ah, thaihu a awm angla Pathen tengah thui lah, doot lah, bih lah. Na kaw khuiah aka awm tang tang nawh thaihu, sai mailai, a phung mailai la sai bol. 'Pathen te saipaat la sai bol,' (Galati 6:7). Na pia tengah a hawng awl na thui kawinih, na pia na thai na latna a mingna. Na hingna dawngah a tak la aka awm te thui peh. Na pia on ahyp thaihu pheng na thui hih angla, Bawipa te byh langtah, thui peh. Na tengah Bawipa awm. Na sai thai nawh te na lungbui tang on Bawipa tengah na thui vengah Bawipa lawng avan hutuung. Ngaiyyp ruila bih lah.
4. Bawipa kawngaihna te roi lah. Bawipa kawngaihna tah a awl dawngah tyng. Bawipa kawngaihna tah nang kah kawngaihna lak ah dung ngaai tih theen ngaai. Nang theenna hamla a Capa khyhdyyn pateng khaw m'peek tite ming mangkhak. Raina na tawng vengah, Pathen kah awlcekna ni, tila hau pok bol. Diklai thawlh cek hamla Pathen capa a law monih, thlawn ham ni a law (Johan 3:17). Raina he Seitan teng kalawng aka law ni. Tede Pathen lawng metyk ahkhaw nang te Seitan kut dawngah tlim hamla ngaih nawh. Thlanghing tengah aka law nook nawh sykhalhna te nangmi tengah a law monih. Pathen tah a yp awm; ahih lawng na yh thai lek nawh sykna te na saw ah paisak manawh. Sykhalhna na taawng bal cakhaw, sykna na taa thai naham a hih lawng lawngpui avan rok ai (1Korinth 10:13) tila Paul lawng avan thui. Raina na taawng tih a tengah na heng vengah Bawipa lawng alo la n'ruun badai. Na rah awl avan zaak vetih, na kawthee-na te a huh vengah nang benah pai vetih n'thlawn ai.

He he tahe ah sai pahoi lah!

A saw kah awl angla tahe kalawng pok langtah hing pahoi loih. Pathen lawng a Capa on pia la n'sai pon. Na lungbui te thaisak pan langtah a saw kah awl angla hingna tawng van loih!

Pathen pia la aka khyh tih a ngo ngaihna soprep ah Pathen tengah aka thangthui thlaangthli tah a zou theen u, metitah a ngaai maawng u popa ai! Amen!

KAWNGAIH SOP SEH NA TI ATAH

KAWNGAIH SOP SEH NA TI ATAH

Bawipa dawngah awmngaihna khyh lah, na thinkaw hy ngaihnathli te amah lawng m'peek badai. Na cehna lawngpui te BAWIPA kut dawngah hal lang amah te ypna lah, amah lawng avan sai badai (Saam 37:4,5).

Na thinkaw boih on BAWIPA te ypna lang namah kah mingna dawngah hangdang u bol, na ceh na awmna rook ah amah te ming lah. Te atah na lawngpui te avan dongsak ai, (Tahtuk 3:5,6).

'Ypna' a awm nawh atah, tangna awm thai nawh. Tangna a awm nawh atah awlngaaina awm nawh. Awlngaaina a awm nawh atah thaihu sai hamkoi coong thai nawh. Kawngaih thaihu a coong thaina ham, a sop thaina ham a u ng'ypna lah ai. Thaihu saithaina aka khyh thlaang ng'ypna ai ta nizaw? A thaihu sai khaw m'ming dengah ni ng'ypna thai bal hyn ai. Motor aka mawng thai nawh thlaang te Kawl ram la motor van mawng langtah n'ceh pui, na tina kawinih aka coong thai nawh la awm. Metyk ah khaw Kawlram na pha thai nawh my. Na pha ngaihna, na kawngaihna aka coongsak thai nawh thlaang tah namah ni. Na ngaihna byng te na pok tih metila ka pha thaina ai, ti tetah lat na pok nawh. Na ngaih sarui thlaang te Motor van mawng, na tina atah aka coong hamkoi thaihu nawh ni. . Diklai dawngah kawngaih thaihu sop thai nawh. Aka sopsak thaikung khaw awm nawh. Te dawngah kawngaih sopna, soprep cungkym a sopna ben te n'lamtoon u. Tede he diklai dawng ng'awm khui vengah khaw kawngaih he n'tlap u. Ngo-ngaihna sava nawh ng'khyh u. Metila n'dang thaina lah ai?

Celtuih Paul lawngtah, "Tharana aka pekung rang on thaihu boih ka sai thai" (Filipi 4:13) tila a thui. Tu dawngah kai? Paul lawngtah thaihu aka saikung kah kawngaihna te lamha la a ming. Thaihu boih boih he Pathen lawng akung adawng boih a hoop tih a sai, tite a ming. Pathen kawngaihna angla amah on amah a nawn u vengah Pathen lawng ahih hamla thaihu theen ngaai a sai petih aka coong thai nawh khaw a coongsak tite a ming. Te dawngah, "Amah aka lungnathli on amah kah kamthlahna angla a khythli hamla thaihu boih boih Pathen lawng atheen la a sai pe, tite m'ming u" (Rom 8:28) tila a thui. Pathen awl lawng na lungbui khuiah Ciim Muithla hawna on bi a bi atah na lungbui hinghang vetih 'A khyna awlthang te na zaak' ai. Awmngaihna mikphi tui on nang aka saikung, na kawngaih aka van sopsak thaikung te na huh ai. "Apa, vaan on nang haaiah ka thawlh ouh pon, na ca lakhaw khy ham ka koih tlaih nawh," (Luke 15:21), na ti vetih thawlh zutna on amah tengla na mel pon ai.

Vaan on diklai aka sai tih na thang thlan veng kalawng nang hamla thaihu theen aka saikung te na lungbui ah a hing pon dawngah ahih byng te na ypna pon ai. Bawipa te na ypna pon dawngah a awl te na ngaai pe thai ai. 'Na awl dawng byng ka awmngaih, Bawipa na awl dawng byngah m'maawt lah,' tila laa na sak byng myhla na hingna dawngah, a awl te "na lawngpui aka van thykung haithoi," (Saam 119:105) la awm zozah pon ai. Lawng na hang tlaih manawh. Na kamthlahna hyn te na pha thai ai. Na hingna boih te amah tengah pe langtah, avan thui awl te ngaai lah. NA KAWNGAIHNA SOP PON AI! Oih, Amen!

Te atah he laa he na kut bel lang na kaw khui ah Bawipa tengah thangthui ruila sa lah.

Kri hu ka baang ai, tuileh kap cakhaw

Haleluiah! Ka khui bawilenna awm pon,

Kai he n'silh ciim pon, thisen ka ypna,

Haleluiah! Ka khui bawilenna awm pon.

Bawilenna awm, bawilenna awm

Haleluiah! Ka khui bawilenna awm pon.

Bawilenna awm, bawilenna awm,

Haleluiah ka khui bawilenna awm pon.

Ka thawlh tangkiik de Jesu ka been tih,

Haleluiah! Ka khui bawilenna awm pon,

Thawhka ka khook tih kai he ng'kuunsak pon

Haleluiah! Ka khui bawilenna awm pon.

Thahoong thlaangthli aw, kai on cet haih sih,

Haleluiah! Ka khui bawilenna awm pon.

Kai he n'silh ciim pon, thisen ka ypna,

Haleluiah! Ka khui bawilenna awm pon.

He awl aka teethli boih kah lungbuiah Bawipa kah Ciim Muithla lawng bibi selang kawngaih sopna Jesu te pan kop hawn seh. Amen!

November 14, 2007

Singapore

"Thang Kopna" tihe N'tu kai?

"Thang Kopna" tihe N'tu kai?

Nikodemu aka mingna thlaang khat awm. Nikodemu ti thuingaihna tah a song la aka awm thlaang, tina ni. Ahih hetah hinzah kap thlaang la awm, bawkna benah maawtkung la awm tih Juda ukkungthli tiimah khaw aka thuum thlaang la awm bal. Zin at atah Nikodemu he Jesu teng la cet tih, 'Rabbi, nangtah Pathen teng kalawng aka law cangpuikung la na awm tite kan ming u. Pathen lawng awm pui nawh kawinih a u lawngkhaw nang lawng na sai kawpokrai noknathli he sai thai tang manawh, a tina.

Jesu lawng a awl a thlat pe tih, "Awltak kavan thui, a u khaw a thang kop nawh atah Pathen ram hu thai manawh," a tina. 'Thangkopna' ti he tah Ciim Muithla dawngah Pathen on athai la tuhkaina he ni.

Nikodemu lawngah, "Metila a patawng congah thlaang lawng a thang kopna ai? A manu bung khui la a pabe la kuun kop vetih thang kop thai nawh ai ta!" a tina.

Jesu lawng a tengah: "Awltak ka van thui, a u khaw tui on Muithla ah a thang nawh atah Pathen ram khuiah kuun thai manawh. "Na thang kop hamla awm," ka ti dawngah na ngaai hang sak hamla awm nawh. Khawthlii lawng a ngaihna ben la thlii praap. Khawthlii awl tah na zaak de, me kalawng a law tih mela a ceh tite na ming monih. Muithla ah aka thang thlaangthli tah te tila ni a awm u," a tina.

Nikodema lawng, "Te atah he he metila a awmna ai?" a tina.

Jesu lawng: "Nang he Israelthli khuiah cangpuikung aka tyng kor la na awm de, he angthli he khaw na zaming nawh aw? Awltak kavan thui: m'ming thaihuthli ni n'thui u tih ng'huh thaihu te m'pai pui u, tede kaimi kah paipuina he na dou thai u nawh tong tong hyn. Diklai thaihu kawng kavan thui vengah pateng khaw na zaming u nawh pai ah metila vaan thaihu kawng te na tangna u paai ai? Vaan kalawng aka rum thuk -Thlanghing Capa – nawh atah a u khaw vaan la cet thlan hyn," a tina.

Te congah, thinglam taai dawngah amah taai la a awm hamkoi te opsoh la a thui pe: "Mousi lawng ramhym huuhaangah ruul a taai angla, amah te aka tangna thlaang boih lawng dungzaan hingna a khyh thaina hamla, Thlanghing Capa khaw taai la awm van ai.

"Pathen lawng diklai a lungna tangkiik dawngah a Capa khyhdyyn te a peek, ahih te aka tangna thlaang boih tah haataa pawcii u nawh vetih dungzaan hingna te a huh u ai. Diklai dawksak hamla Pathen lawng a Capa te van tuih nawh, ahih rang on diklai thlawn hamla ni avan tuih. A u khaw ahih aka tangna thlaang boih tah dawksak la awm nawh, tede a u khaw aka tangna nawh thlaang tah Pathen Capa khyhdyyn khat te a tangna nawh dawngah dawksak la awm pon.

He thaihu he aka zoica ni: Diklai dawngah angna te law pon, tede thlaangthli lawng athee thaihu te a sai u dawngah angna lak ah ziinna te a ngaih bet u. A u khaw thaihu thee aka sai lawng tah thaihu theen te a thii-na, a thaihu sai theen nawhthli tyng hau ai, a ti dawngah angna khui ah kuun hamla ngaih u nawh. Tede a u khaw awltak on aka hing thlaang lawngtah angna khuiah va law, a thaihu saina te Pathen rang on ni a sai tite boih tyng koor (Johan 3:1-21).

Muithla on aka Awm Celtuihthli lawng He awl Dawngah Angna A Tyngsak u.
Paul lawng Pathen a thangtheensak tih:

"Mami Pa Pathen on Bawipa Jesu Kri teng kah reenna awm hawn seh. Mami Bawipa Jesu Kri kah Pa Pathen tengah kohna awm hawn seh, vaan dawngah mami te amah lawng zoutheenna m'peek tih Kri dawngah Muithla ben zoutheenna soprep te m'peek pon. Aka ciim caawtbauh kap myhla a haai ah awm hamla diklai syn thlan veng kalawng mami te n'tyk pon. Lungna on amah lawng mami he a ca la cuun hamla Jesu Kri dawngah opsoh la ng'hoop pon, amah kah awmngaihna on kawngaihna angla – a bawilen reenna kohna on, Amah lawng a lungna thlaang dawngah mami te a zoo la m'peek pon. Amah dawngah a thi rang on thlawnna te nghuh u, thawlh khawdawp ngaaina, aka dung tangkiik Pathen kah reenna angla mami saw ah cuihna on zakmingna te haih myh la m'vui thil. Amah kah aka theen awmngaihna, Kri dawngah a kamthlahna a awm pon angla, amah kah ahyp kawngaihna te mami tengah a tyngsak pon. Aty a khok vengah vaan on diklai dawng kah thaihu boih boih kah lu la aka awm Kri hui ah khyh pe kang hamla a kawngaihna awm pon.

Amah dawngah mami khaw tyk la ng'awm u, amah kah ngaihna angla thaihu boih aka pokkung lawng a kamthlahna angla ng'hoop opsoh pon, a bawilenna aka kohkung la ng'awmna u thai hamla mami tah Kri dawngah ngaiyypna aka khyh cyk la ng'awm u. Nangmi khaw awltak nangmi thlawnna awlthang theen te na zaak u vengah Kri dawngah na thuum u van pon. Na tangna u pon dawngah nangmi pum dawngah nokna Ciim Muithla awlkhyhna te awm pon. Pathen kola aka awm amah kah bawilenna koh hamla aka awmthli kah thlawnna a pha thlan hil mami kah rou pang ham dawngah ahih te hawlh la awm (Efesa 1:2-14).

"Pathen Casak" thlaang dawngah Celtuih Johan lawng he tila a thui:

Jesu tah Pathen lawng a sak Kri ni tila aka tangna thlaang boih on Pa aka lungna thlaang boih lawngtah a ca khaw a lungna. Pathen cathli lungna tite mingna tah heni: Pathen n'lungna tih a awlpeekthli m'vai heni. Pathen lungna tah: a awlpeekthli ngaai heni. A awlpeekthli he a rih thlang aih monih, Pathen lawng a cuun thlaangthli boih lawngtah he diklai he a taa. Diklai n'taa tih ng'hepna tah mami kah ongna heni. A u lawng diklai he a taa? Jesu tah Pathen Capa ni tila aka tangna thlaangthli byng lawng ni a taa thai (1Johan 1:1-5).

Pathen lawng Jesu Kawng a thuina dawngah Johan lawng he tila a thui bal:

Thlanghing kah ming puina pateng khaw mami lawng n'dou u atah, Pathen kah mingpuina tare tah bou ngaai, metitiah amah capa m'peekna te Pathen kah mingpuina la awm. U khaw Pathen capa aka tangna thlaang tah amah kaw khuiah mingna te a khyh. U khaw Pathen aka tangna nawh thlaang tah amah Capa a peekna dawngah Pathen kah mingpuina te a tangna nawh dawngah amah te hom aka thui la a sai. Mingpuina tah heni: Pathen lawng dungzaan hingna te m'peek pon, tekah hingna tetah amah Capa dawngah awm. U khaw Capa aka khyh lawngtah hingna te a khyh; Pathen Capa aka khyh nawh lawngtah hingna te khyh nawh. Dungzaan hingna ka khyh tite na ming thaina u hamla Pathen Capa ming aka tangna nangmi tengah he thaihuthli he kavan thut (1Johan 1:9-13) tila a thui.

Piter lawng "aka pawci thai nawh" thaihu pahih avan thui:

(1) Kri kah thisen. "Metitiah nangmi tah na pahaamthli teng kalawng nangmi tengah peek patong la aka awm ahawng ahii hingna dawng kalawng aka pawci thai sui ngun on tlang la na awm u nawh tih caawtbauh aka kap nawh tuuca, Kri thisen phu tlou on ni tlang la na awm tite na ming u pon. Amah te tah diklai syn la a awm thlan vengah tyk la awm pon de, mami hamla hekah hukhyng ty veng heah phousak la awm. Ahih rang on dykna kalawng ahih a thawh tih thangpawmna aka pekung Pathen te na ong u, te dawngah nangmi kah ongna on ngaiyypna tah Pathen dawngah ni a awm," (1Piter 1:18-21) tila a thui.

(2) Pathen Awl. "Metitiah nangmi tah na thang kop u pon, aka pawci thai amu dawng kalawng ah nawh tih aka pawci thai nawh dawng kalawng ni, aka hing on aka cak Pathen awl dawng kalawng ni na thang kop u pon. Metitiah 'thlaang boih he ram angla ni a awm, a bawilenna khaw ram kah apaai angla ni a awm; ram tah reu tih apaai khaw zai. Tede Bawipa awl tah zozah la cak. He awl heni nangmi tengah phawng la aka awm,' (1Piter 1:23-25).

Zaan Veng Thlangbol kah Ongna

Thangkop nawh atah thangthai he n'tu kai? A thai la thangna hetah Pathen kah kawpok rai bibi la awm. Pathen awl lawngah a thai la thangna he 'dykna khui kalawng thawhna,' nawh atah, 'athai la sai panna,' nawh atah 'dykna kalawng hingsak kopna,' tila a thui. Te dawngah thang kopna (regeneration) he thlanghing kah saithaina dau kah thaihu ni. Thlanghing kah pokna dau ah Pathen lawng kawpok rai thaihu a saina la awm. Athai la thangkopna he Pathen lawng diklai a syn cyk vengkah saithaina on thlangdyk thawhkopna lak ah heem tlo nawh. Te dawngah he tila Pathen lawng kawpokrai la a thinkaw khuiah bi aka bi pe thlaangthli tah thlauh tlaih ouhla, thlaawng myh la thangthai u. A thawlh zut u tih Awlthang theen awl te a tangna u.

Ong thlaangthli lawng hing khui vengah thangthaina he metila a lawna ti te ming heet u nawh hyn de, Pathen reenna rang on Pathen te a ypna u tih thlawnkung te atang tang la lungbui on a lungna u (Canons of Dort, Articles 12,13).

Ongna aka song he n'tu kai? Lamha cyk ah, ongna aka song tah Pathen Awl dawng kalawng tawng u. Pathen Awl lawng Baibul dawngah a phawngthli boih he song tila tangna dawng kalawng tawng u. A pabena atah, Kri rang on a reenna dawngah ka thawlhnathli boih khawdawp ngaai la awm pon, tite adung thlang la tangna heni. Ciim Muithla lawngah, kai onah aka tangna thlaangthli boih tengah, thawlh khawdawp ngaai la awm pon, Pathen on dungzaan ka rop ahih pon, thlawnna te m'peek pon, tila mingsakna te a van khyh, (Heidelberg Catechism, D/T 21).

Awlpui Cangham Koi

Juda bawkna benah maawtkung la aka awm, Jesu doot hamla aka law Nikodemu tah Pathen kah lawngpui te a ming nawh dawngah bro nawh la a kawpok bot. A zakming thai nawh dawngah Jesu awl te dou hamla a thaana. Zaan vengah tawngha Isaiah lawng ana thut sut awl te a ming ham awm de ta. Isaiah lawngah, Pathen kah pokna tah mami kah pokna lak ah bro nawh la saang tila ana thui pon. Pathen te olh lak ah thlangcuih lawngtah Pathen lawng a thui awl te ongna on a dou. Tawngha Isaiah lawng he tila ana thut:

• Huh hamla a awm vengah he Bawipa tah tlap u lang; a zooi vengah khy u lah.Thlangthee lawng a moibo tong pon selang, awmtlol thlaang lawng a poknathli tong pon seh. Bawipa benla mel pon seh, te atah ahih te a reen ai. Mami Pathen lawng ahih te zahawh thlang la khawdawp a ngaai ai. Ka pokna he nang kah pokna nawh tih na moibo khaw kai kah moibo awh ni, tila Bawipa lawng a phawng. Vaan ke diklai lak ah a saang ngaai angla, kai kah moibo tah nangkah moibo lak ah saang ngaai tih ka pokna khaw nang kah pokna lakah saang ngaai. Vaan dawng kalawng khawtlan on rawsawng a tlan thuk vengah, Taawi-anthli a keesak tih a thluurtaawisak, a timu aka hehkung hamla a thaih thaih tih buh aka ca thlaang hamla buh awmsak myhla, diklai syyp myhla a mel hang kop nawh angla, ka kaa dawng kalawng aka suntla awl khaw awm; ahawng ahii la va mel kop manawh, ka kawngaih te a cong vetih ka kamthalhna dang hamla ka tuih-na te a thaitaksak ai (Isaiah 55:6-11).

Jesu lawng Nikodemu te a dou angla amah aka tlapthli te tahe ahkhaw a dou zozah. Tede kawthee hamla aka awm tah Nikodemu lawng Jesu awl te ahu la pok hamla a kadaawk. Ciim Muithla rang on thut la aka awm Hebrai cabu lawng atah, Judathli lawng Jesu te a hang tlaih nawh hamla ngaithyynna awl a thui pe. Tede Juda thlaang zahawh lawngtah tekah ngaithyynna awl te tula sak u nawh tong tong hyn. Tekah ngaithyynna awl te mami hamla khaw awm van, "Tihin ah a awl na zaak u vengah na thinkaw niingsak tlaih u bol.' Nikodemu lawng a zooi cala he tila mah thangthui mai kawinih a hingna thawleng u sui de ta.

• "Ka thinkaw khuiah, ka thinkaw khuiah, Ka thinkaw khuiah law lah, Bawipa Jesu! Tihin ah law langtah, law langtah awm lah, Ka thinkaw khuiah law lah, Bawipa Jesu!" tila.

Aka thangthai thlaangthli tah Pathen Awl a zaak tih Jesu te a Thlawnkung on Bawipa la aka douthli, hingna thai on aka hing thlaangthli la awm u. Tethli khuiah Ciim Muithla te awm. A thinkaw lang u tih, a thii-na te a lungna u, thaihu thee a sai nookthli te a ceh taak u. He nawh aw Jesu lawngah, "Na thang kop hamla awm," a ti laawt.

Assignment

Assignment

Me titiah mami tah Pathen kah kutsai, mami hamla Pathen lawng opsoh la avan rokbah thaihu theen sai hamla Kri dawngah syn la ng'awm u. (Efesa 2:10)

Nang lawng nan peek bibi te ka congna rang on diklai dawngah na ming te ka thangpawm pon. (Johan 17:4)

Sengim aka kai boih lawngtah saza lawng im ah sai hamla home work (ingca) m'peek he boih a ming u ai. He he assignment khaw ti u. Im ka pha congah ca ka sai ham te ka ming khaw ka ming de, ka piathli on ka hang ka tal ngaih yyt ah ca sai ham vik ka thlaa. Thangvyn mincang sengim kop ka ceh veng atah caalla ka lakyng, saza lawng m'bawh bal pon ai o, ka ti. Saza lawng m'bawh tonglong. Im ah sai hamla saza lawng bibi m'peek te kamah hoihkhangna, ca ka mingna ham de ni. Ka piathli on awmtheen boon ka ngaih yyt ah sai myhla ka awm tih avyyn atah saza lawng m'bawh. Nganbawh ka zaawk tih ka dawk sut.

Diklai dawngah kawlkalh ni ng'awm u boih ai. Sengim n'kai po nawh angla, diklai dawngah a u khaw ng'awm po u manawh. Tu ah ti atah, Pathen awl lawng, tahe ng'awmna dilai im he phe la awm cakhaw kut on sak nawh Pathen lawng avan khyh vandawngah dungzaan im ng'khyh u tite m'ming u (2Korinth 5:1) ti. He diklai dawngah imcak ng'khyh nawh tih aka awm hamkoi khawpui te ni boih n'lamtoon u, tila Paul lawng avan thui bal. Mami tah kamzin la ng'awm u, tila Pathen awl lawng avan thui. Sengim kah assignment tah mah hoihkhangna hamla, cuihna ben ah n'roongna hamla awm. Tede tahe kah assignment n'thui ham hetah atlo ca la awm. Sengim kah tah cuih thoomna tare hamla awm de, tahe kah hetah cuihthoomna byng myhla a reenna rang on dungzaan hingna aka dang thlaangthli, Pathen cathli la ng'awm u dawngah Pathen tengah ymna tyngsakna assignment la awm.

Diklai dawngah na awmna he namah lawngkhaw na ming monih. Nang aka khyhkung Pathen byng lawng ni a ming. Diklai syn la a awm thlan veng kalawng Pathen lawng nang he m'ming pon (Efesa 1:4). Namah kawngaih sai ham byng la diklai dawngah na awm monih. Pathen kawngaihna sai hamla ni na awm. Kri kah kawngaih sai hamla diklai dawngah thlanghing la na coong. Paul lawng, Kri kah bibi hamla ng'awm u (Kolos. 3:23-24) ti. Sengcamo lawng assignment a khyh angla, nang khaw Pathen kah assignment na khyh van. A zo la u khaw ng'hing nawh ti azo la u khaw n'dyk monih (Rom. 14:7). Zaan vengah, Pathen lawng tawngha Jeremiah tengah, na thang thlan veng kalawng kan hoop pon, (Jeremiah 1:5b) a tina. He he tawngha la Pathen lawng Jeremiah a hoopna kawng a thui. Te kah Pathen bibina te Paul lawng hekah a reenna hetah aty a tawng thlan veng kalawng mami tengah Jesu Kri dawngah m'peek pon, (2Tim. 1:9) tila Timote tengah ana thui pe. Tekah bibina assignment sai ham la, nangmi tah aphu on lai la na awm u pon dawngah na pum on Pathen te thangpawm u lah, (1Korinth 6:20) tila Paul lawng acaih cala avan thui.

Te dawngah nghingna he mah ko la awm nawh. Pathen ko ni. Na pum te namah ngaihna angla na hawna thai nawh. Na hawna atah pumsa cangti na tuh phu dykna ni na ah van ai (Galati 6:8a). Na hingna te aka hing luciik la nawn hamla Pathen kawngaihna ni, he diklai sing angla ng'awm ham tlaih nawh ni (Rom 12:1-2). Pahaam Ngai Tim lawng Paul awlthui angla (Filipi 1:21), laa a phawh he hutuung lah: Kai tah ka dyk tih ka hing kop pon; Ka hingna tah Jesu Kri ni (Matu Pathen Kohna Laa Number 125 :5) byh lah. Kri lawng ng'hingsak kop pon ta. Thou langtah na ngan te sik lah, tlou aw? A tlawh na zaak atah na hing, pon ta te. Kri kah hingna he na thang thlan vengah ni Bawipa lawng nang ham m'peek pon ta. Na tangna aw? Na tangna nawh atah, na tangna nawh te me kalawng a law? Pathen teng kah aw, namah pokna dawng kalawng aw? Namah pokna dawng kalawng a law atah Pathen lak ah namah awl te aw, na tangna ngaai lat ai? Pathen lak ah na ming bet tih aw? Te nawh aw Seitan kah thailatna lawt. Baibul awl lawngtah, A u khaw Pathen Capa te aka tangna lawngtah dungzaan hingna a khyh; aka tangna nawh lawng tah dawkna (dykna) te a huh (Johan 3:16) tila avan thui. Na hing kop pon ta! Na hoih kop pon ta! Pathen bawilenna na kaw khuiah awm pon ta! Thou langtah assignment te kawho cala sai loih saw. Piter mase tah tlou de, Bawipa lawng a hoihsak, thou tih tethli te pahoi a dou a dan (Mat. 8:15) deta.

Na hingna dawngah Kri he a tang la awm aw? A tang la a awm atah, a phu thui lek thai nawh dungzaan hingna na dangna dawngah, awmngaih ruila, ym tangkiik on a bi na bi ham ro ro la awm (Saam 100:2). Pastor, Evangelist, on ahaamca, deacon cing na bi ai, tina monih. Pathen thlaang, Kri thlaang la aka awmthli boih he Bawipa lawng amah kawngaih bibi (assignment) rip a peek. Nang khaw Jesu Kri thlaang la awm van hamla a khythli tiimah na thuum van (Rom. 1:6). Kri thlaang la na awm van pon dawngah nang kah paihyn he a ngo tangkiik, a ngo dawngah Pathen lawng nang he diklai dawngah ngkhyh. Kri kah thlangbol, Kri kah a pum khuiah nang khaw na thuum van (1Korinth 12:27) dawngah awlpui la na awm, tihe na ming hamla awm. Kri thlangbol khuiah na thuum van dawngah, thlangbol kah me ang bibi ben ah tavuan a awm kai, tite kop sopsa u lah. Pum khuiah tehca la aka awm mik a tlawh atah pum boih lawng a zaawk angla, nang kah bibina a awm nawh dawngah thlangbol khuiah bro nawh votna awm pon tite ming loih. Thlangbol ben kah thaihu lamtoon myhla kai lawng metila thlangbol Kri pum hamla hoikhangna ka sai van lah ai, tite pok lah. Kri awl he hilh hamla awm nawh, Thlanghing Capa lawng thlaang bibisak hamla law nawh tih thlaang kah bibi hamla ni a law, (Mathai 20:28) a ti he ming khak tih te tila hing van hamla awm. Dang lak ah peekna he awmngaihna bou ngaai (Celtuih 20:35). Bawi Kri on a dongna lamha la aka tlapthli hamla Bawipa lawng zoutheenna zahawh a peek. Thlaang hubaang la khyh nawh, maawtkung lu la a khyh zozah. A hingna zahawh aka pe thlaang mingthang la awm tih hingna phu aka khyh thlaang la awm u. Tede moithee thlaang tah khawdeng tare ( Tahtuk 11:24).

Diklai a botna hin atah Pathen haai ah thlaang boih pai u ai, a thaihu sai boih te a phawng u ai (Rom. 14:12). Amah ham byng aka hingthli saw ah Pathen thinsa-na te awm ai (Rom 2:8). Tede Bawipa on a thlangbol hamla a hingna aka thlaawng, patang aka khang, bi aka bithli lawng zahawh a dang u van pon vetih, diklai dawngah awmtheen boon mah byng ham aka hingthli lawngtah Bawipa kah thinsa-na te a taawng u tlop van ai (Marka 8:35).

Na hingna he asan tih a tawi dawngah a phu awm on awm nawh mingna nawh (Rom 12:5), Kri hamla na hing dawngah amah bawilenna hamla, amah koh hamla na hing aw, na hing nawh aw, te ni. A u khaw aka sop bir awm nawh o. Te de Bawipa kah bibi te rip sop myh la a bi u. Abraham khaw a patawng de, Pathen lawng a hawna, Gideon he khawdeng, Jakob he thailat thlang la awm, Samson awl ngaai nawh, Rahab pumzoi nu la awm, David thlaang thi a kut dawngah byym, Jonah awl eek la awm, Naumi huhai, Piter thintawi thlaang, Marta lakyng byng lakyng; Samaria huta va mon a khyh; Zakeah a pyh aka ngaih; Thomas thlaang upvot raa; Paul sa ding nawh; Timote camaw, he tila ni thlanghing kah votthokna boih a awm. Tede a lungbui ah Kri hingna a awm u dawngah sop nawh ruila, dungvongna on bi boih a bi u. Pathen lawng tethli te a hawna tih a ym.

Pok u langtah assignment (အိမ္စာ) tu na khyh, sai van loih.

----- 000 -----

Tu Hamla Na Awm?

Thaihu boih boih he amah (Pathen) lawng amah hamla a sai (Kolose 1:16b).

Amah kawng aka pok thlaang awm tih aka pok vaai nawh thlaang khaw awm bal. 'Kai he tu hamla diklai dawngah ka awm kai aw?' tila na pok vaai aw? Namah hamla na pokna on thaihu boih na rok na bah kawinih na ngaihna angla thaihu coong nawh my. Tu dawngah ti atah nang thlanghing la aka coongsak kung lawng ni nang hamla thaihu boih avan rok avan bah ai.

Nang thlanghing la aka coongsak tih na hingna lawngpui aka van rokbahkung he a u?

Baibul lawng he tila a thui: Ahih kut khuiah ramsa soprep on thlanghing boih kah hiilna te awm (Joba 12:10).

Mah on mah ng'yp u tih, 'Kamah lawng ni thaihu boih ka sai. Kamah ni,' n'ti kawinih nang aka saikung a kaw thee vetih na ngaihna te coong thai manawh. Pathen lawng nang he n'sai tih amah lawng hing seh, a ti dawngah ni na hing.

Thlaang khatsut lawng Pathen a ming van de, ahimi kah ngaihna saisak ham byngla Pathen te a ngaih u. A ngaihna a sop pon atah Pathen te ngo tlaih nawh. Baibul lawng he tila a thui: Thlangthawlh kah thinkaw tah dykna la awm tih muithla lawng a maawt thinkaw tah hingna on ngaimawngna la awm (Rom 8:6) ti.

Pathen te a Bawipa on aka maawtkung la khyh myh la kawngaih thaihu saisak ham rungla Pathen aka ngothli kah a botna tah dykna ni, tite nghuh. Mah ngaih kamthlahna na saithli te kawlkalh ham rung tah theen mai thai. Tede nang aka saikung lawng nang dawngah a kamthlahna te na thlaawng pon dawngah na hingna dawngah kamthlahna aka pha nawh la awm tong tong. Baibul lawng he tila a thui: U khaw a hingna te thlawn hamla aka ngaih lawngtah a thlaawng ai, te de kai dawngah u lawngkhaw a hingna te a thlaawng atah a huh ai (Mathai 16:25) ti. Na hing kaa van de, Pathen lawng nang hamla thaihu avan khyh te na ming nawh dawngah hing khaw zawkkaa la awm.

Tu hamla diklai dawngah na thang? Thaihu soprep a kung a dawng boih aka ming tih thaihu aka sai mailai nawh Pathen lawng nang hamla kamthlahna bou thlang avan khyh te pangsak hamla diklai dawngah na thang deta. Te te ming hamla na ngaih atah dungzaan awltak Pathen awl dawngah tlap langtah tee lah. Pathen awl Baibul khat lawng atah he tila avan thui: Kaimi lawngtah Pathen kah ahyp cuihna, thuh la aka awm, aty tawngna a awm thlan veng kalawng Pathen lawng mami bawilenna hamla avan hoop cuihna te ka phawng u (1Korinth 2:7) ti. Pathen amah ro ro he mami thlanghing hamla akung la awm tih amah dawngah thaihu boih boih tawng u. Amah lawng thaihu boih a rok a bah. Pathen dawng byng ah ni na ty tawngna on kamthlahna a song te na huh ai.

Pathen awl lawng he tila avan thui: Amah dawngah mami khaw tyk la ng'awm u, amah kah ngaihna angla thaihu boih aka pokkung lawng a kamthlahna angla a hoop opsoh pon. A bawilenna aka kohkung la ng'awm thaina u hamla mami tah Kri dawngah ngaiypna aka khyh cyk la ng'awm u (Efesa 1:11-12).

Pathen awl lawng avan thuina angla he tila pok langtah na thinkaw te rokbah lah:

• Nangtah Pathen lawng n'sai dawngah Jesu Kri ko la na awm tih a kamthlahna te nang pum dawngah coongsak hamla a ngaih.
• Nang na thang thlan vengah Pathen lawng na thang hamkoi, na zu/va ham koi, thaihu sai hamkoi boih avan rokbah pon.
• Pathen amah kut dawngah hal u langtah Pathen lawng nang bawilenna hamla avan rokbah opsoh tem ah sai lah.

Te atah:

1. Ka hing lawng ka ming pon.
2. Cangpuikung Bawipa Jesu amah cing he ni, na ti thai pon ai.

By: Rev. Chan Thleng