KHUUILAM
Cil awl on aka bot thai tlaih nawh khuuilam thuihna ben khaw sai u tlaih bol seh. He ang thaihuthli lawng ongna ben Pathen bibi lak ah olh u thena a coongsak lat. (1Timote 1:4)
"Na pa khaw na ming van nawh ah, thlaang lak ah ree na zan u van!" he awl he kop kop a pok vengah, thlemvaai atah a zakdam thlang de, tahe atah, a kaw khui ah zakming thaina a khyh pon.
Lamcawk ben ngaai ah Kui Hung nuca im tah awm. Kui Hung tah a camo veng kalawng a manu on awm hih. A napa a awm nawh dawngah a piathli lawng a hep u tih, a ming tak on khaw a khy myh la "Pa Nai" a tina u. A manu lawng a cawm thai nawh dawngah sengim tangha to tah a awng van de, college kai thai tlaih nawh. A camaw veng kalawng a manu kah cangsakna on thuitunna, pum im kah Sunday school cangsakna byng a ha khuiah a khyh. Voh voh a cadawng kalawng tah tui a thaan, thing a phuih, buh khaw a thaawng. A manu caalla a reen. Khawhaal seng im khaih vengah hulathli on tuihawi rasak, pawngram ceh tih tawi-an tlapthli caalla a awmtheensak. Pathen bawkna ben atah Pathen Capa Jesu Kri lawng ahih zyng la thawlh phu laiba a sah pe tih Kri ah thlawn la a awmna lak ah awmngaih saang atlo khyh nawh. Awlthang theen aka van thui lamha pahaam bibikungthli a ym tangkiik tih, tethli kah khawleh thuih van hamla kamthlah. Awlthang theen thuina Gospel team ceh, khawziin ram hiil, tih Bawipa ram bibina soprep ah aka tlungmu la awm. Bawipa awl a thintlawhna tangkiik dawngah Matu Baibul akung kalawng adawng to vaihih vai thum aka tee la awm. Pa aka khyh nawh la a awm dawngah Pathen bibikungthli boih tah nu on pa angla a ngaai tih a hinzah. Kri hingna on khaw aka sa la a awm dawngah lungna on thlaang boih saw ah theen hamla a pok popa. Kri hingna ben ah miamanau la boih ng'awm u tite a ming tang tang. He diklai sing angla awm u tlaih bol langtah na thinkaw te thaisak pan lat u loih, te atah Pathen kah kawngaihna aka theen, ym koi on aka sop ahih kah kawngaihna te na nok na dak thai vetih na ming thai ai,' (Rom 12:2). He awl he ahih kah lungbui ah awm. Te dawngah, ahih tah a u nam, te thlaang tah me kah, a u phun, he ang he a lungbui khuiah awm tlaih nawh.
Hin at tah alung vang ah tawh u the tih Pa Tlung Ma thlut thlut a kaawk awl te lamcawk ah aka awm Kui Hung lawng a zaak. A uthli aka tawh u kai titih alung vang la cet hang. Te vengah amah thawnpui Thang Tawm lawngah Reng Pook a lu ah thingbong on a vyyk hup tih du du a thii la hutathli lawng ana veel u te a huh. Kui Hung lawng aka tawh uthethli on aka haak u thethli te a pheh tih a dyymsak. Thang Tawm lawng a byh vengah Kui Hung ni tite a ming. Te dawngah, "Nang lawng thlaang ree, na pheh van, na pa khaw na ming van nawh ah, thlaang haai ah na zan u van!" a tina. Te congah timtui pharh a thaa tih mela nym vik heng pon. Thang Tawm napa Tlung Ma tah kaawk tong tong hyn. Talawng ah huta camawthli sausyng la sut ana pai u. Te vengah, cadawng Kui Hung lawng, hutaathli te a eep tih, Reng Pook lu te a byh pe vengah, a lukhyyp saw ca-ah lethmah pahih avun caan te a huh. Thlemvaai Luke Society kah tuisii ben cangsakna ah ana thuum van bal pon dawngah, alo la tui a beesak congah amah im kah tuisii bawm on vun huuina phaimeet a lawh tih a lola a huui pe. Atlo tlawhmi a kuunna nawh ham spirit a thuut pe congah thlapaawt on khop a zeen pepih Batu la Siloam Clinic kah saya Le Ding mi tengah a lola a cehsak.
Tu dawngah te tila a tawh u the, tina kawng te Kui Hung lawng kop a doot vengah, ngawlhthlungna ah khuuilam kawng a thui u, a tina u. Te vengah ahaamca la Pa. Tlung Ma, Pa. Sawng Pai, Pa. Tlung Nan, Pa. Bawng Kung on cadawngthli khaw mon awm u. Awlthui a tawng hang u tih a hu la tah khuuilam la pok hang. Te vengah vang khuiah a u aka pha lamha, meben kalawng a thaawt, tumpaw aw, nawh atah lawnghang ca aw, ana pathli me kalawng a law u, tite a thui u hang. Te vengah, Pa Tlung Ma on cadawng Reng Pook te olh ahih the. Na pa me kalawng a law, na ca cah delah kon, na pa te cawca den, ti hih thee tih bro nawh la awlthee dik dekdek sat ruila hou ahih the. Te vengah cadawng Thang Tawm lawng ana pa Tlung Ma a ruun tih tlaai, thingbong a lawh tih Reng Pook te a lu ah hup a bawh. Reng Pook mauh a tlim cong atah lakyng u tih sausyng la huta camawthli on sut pai u. Cadawng Kui Hung a law cong dengah Reng Pook te a lu bongha a huui pe, sii a thuut pe congah Siloam clinic a tuih hyn.
He kah awl he na tee vengah cadawng Kui Hung on cadawng Thang Tawm kah paihyn he byh lah. Me hingna he ongcathli kah hingna kai tite pok lah.
_______________________________
Note: Hekah ming aka awmthli he thuinytna ming mai ni.
----- 0O0 -----
|