Ruk Ngaih Hamla Thenngaih

Rukngaih Hamla Thenngaih

A THLIING DING KAH LILI PAAI ANGLA KAI KAH AZEH TAH HULA THLI DINGAH AWM. (Laathli kah laa 2:2)

Thlem ben khawtlan hap khong tih zilh hiip hiip a law dawngah khaw hyyp hyyp siik ngai.

"Na tawn khaw na tawn de cawini. Cang Mai aw, tui thaan de ne, khaw hap on. Hawna ham tui awm tlaih nawh pon he," tila ama nu lawng hula Cang Mai te atina. Sakhang a dawh tih rap dawngkah vaihang a kheel congah huui dawngkah tuihawngthli te a ryk congah tui thaan la cet. Sawk kalawng ava mel cong atah buh an a thaawng, awk a vylh, ainu cacuun ham aipyng a pop pe. Awkvaai no no a deeng bal. Te vengah ana pa pawng kalawng va law. Awkvaai deng te pak a tong tih ana pa kah basui te ko a dul pe. Te vengah ana pa lawng, "Na law pon aw? Me tyk ah na pai?" a tina. Cang mai lawng, "Oih, ka law pon. Cyk khawvaang vengah ni ka pai pon," a tina. Im khui la basui te a thak congah ana pa hamla tuiding ka a lawh pe, "Apa, tuiding aw de, thanthling khaw kavan khyn, ai langtah tuiding aawk thil, na thaa a awmna seh, na baawng pon cawi ni. Khawtlan lawng m'baawp nawh louh aw?" a tina. Ana pa lawngah, "Khaw atlan veng teah Them Lum napa kah paw raawng khong ka pha tih teah ka ziing tih khaw a hap congah ka va law," a tina. A manu lawng Cang Mai paca kah ym aw hih mui a huh vengah awmngaih thlang la cyp nui tih thawhkeeng kalawng hai sawm hamla im khui la a kuun tak.

Cang Mai kah napa he khaw khui kah thlangbol ahaamca committee ah thuum tih ama nu khaw huta benah tlungmu thlaang la awm. Khyhton benah zahawh khyh u nawh de, Pathen aka lungna ongca imkhui kaw la awm u. Khawhaal sengim khaih khuila a awm dawngah Cang Mai he amah khaw la cet.

Cang Mai tah kum thlaikow law tih a sa dau. A mikhai zopsoih la awm tih pe nga congah letmah pathum saang. Pamdoop la awm tih a pum caawtbauh aka kap nawh cyp aka nui popa la awm. A thlaang theen tangkiik tila tah awm nawh de, lungna aka kap la awm. A kaw daw tih a awlcal he neem, thlaang boih on rop u tih camo patawng boih lawng a lungna u. A sam zor a thlaak tih khaw-awk ban taawi a pum on aka nai u a baai congah Matu uniform hinaak a naak heet tih bawtui on syyt a kah u congah Bawia hin (Zeh hin) ah bawk im la Baibul on laa cabu a pawm tih a ceh veng atah Matu canu kah thlang theen aka hu boih lawng byh on dan myh la awm u thai nawh. A camo vengah ama nu on ana pa lawng Pathen kut ah a nawn hih tih a cuih thai hang kalawng Sunday Schooll aka kai popa la awm . Khawlawng thla la sengim a kai thlan vengah khaw khui kah ronglii aka maawtkung la awm. pathen kohna laa sak he caalla a ngaih tih Conference laathli, Lengkhawm veng kah laathli on Pathen kohna laathli bro nawh la a ming. A sa a ding atah Pathen bawk tunna aka thlauh tlaih nawh la awm.

Solomon kah Laathli kah laa 2:2 lawngah, "Athliing ding kah lili paai angla kai kah azeh tah hulathli dingah awm," a ti angla, he tila aka theen lili paai he aka sik ham cadawng mon awm de, hula Cang Mai lawng a hing khui pyr awm haih tih lungna on tlum haih hamla a kaw khuiah a pok cadawng tah he tila awm. 1. Aka thangthai, Pathen aka rih tih Pathen awl aka tee popa;2. Yp awm la aka awm Matu capa;3. Bungkhuutna khok cuihna aka khyh tih imkhui kaw aka byh thawng thai;4. Bibi aka byh tlungmu;5. Lungna aka khyh;6. Thin aka san;7. Khawdawp aka ngaai tih reenna aka khyh;8. Ruui koi ben aawk caak aka sai nawh, thuina maiah zu, sarawh, bing, he ang aka sai nawh;9. Hula sarui aka ngaihdan nawh;10. A ka ook u nawh;11. Thlangthai palat on thlanghyyn la aka awm nawh;12. Hom aka thui nawh;13. A heem kok ah pe nga congah letmah paruk aka law;14. A sa a dau aih nawh ah khaw a myym aih nawh atah poi nawh;15. Kum san tlawhna aka khyh nawh thlaang he hula Cang Mai lawngtah a hing khui pyr ah ypna tih then hamla apok cadawng la awm.

Rukngaih hamla Thenngaih awm de mah ta,

Cang Mai kah kawpok he song na ti van nawh ai aw?