SYKHALH-NA TAANA

SYKHALH-NA TAANA

Thlanghing tengah aka law nook nawh sykhalhna te nangmi tengah a law monih. Pathen tah a yp awm: ahih lawng na yh lek thai nawh te sykna te na saw ah paisak manawh. Sykhalhna na taawng mai bal cakhaw, sykna huui ah na pai thaina ham ahih lawng lawngpui avan rok ai, (1Korinth 10:13).

Thaihu thee te olh lah, te atah na teng kalawng heng badai. Pathen tengah zooi lah, te atah nang tengah ahih te zooi van ai, (Jakob 4:7,8).

1973 kum hin at atah ka mia lawng awkngal a kah tih avyn hin ah sana thuih hamla ka cet u. Awkngal khaw nauh pon de, sana la a awm dawngah a tengah azooi la ceh hamla a rih awm tangkiik. Awk ngal te a thlaak a thlaak u tih a hu la tah tuiva la put cungpung. Tui dawng a zuun thuk vengah ralvaang ah lou aka phou hutathli lawng tui dawngah aka zuun thuk awk ngal te a huh u. Te vengah Pa Im Teng (thlangthii) lawng lumpawk a pawm tih langdaai kalawng a mah. Awkngal lan la puk a cuuk hang vengah langdaai kalawng Pa Im Teng lawng kyng a kah van de, a yn tlung saw ah pawn a kah tih awk ngal lawng Pa Im Teng te lat a thlaak. Te vengah lou ah aka awm hutathli lawng angaih la paang u tih, "Awi Tyyp napa heng , heng, heng," tila a ngaih thlang la a dook thuk u. Pa Im Teng khaw alola la heng tih lan louha sa la phaat avan heng taak. Louha sa avan pha vengah awkngal lawng a mel taak.

Pa Im Teng tu dawngah awkngal lawng a ngeh thai nawh? Pakhatna ah awkngal tah bongha a ka ca te la awm pon dawngah khalaa tlaih nawh. A pahihna ah Pa Im Teng lawng a heng taak. Pathen cathli sykna kalawng a loihna on a taana tah hetila ni a awm van. Awkngal angla Seitan tah bongha caak tangte la awm pon. Kalvari ah a luu neet la awm pon (Genesis 3:15). Tede bongha caak ruila khaw Pathen cathli metila ka dolhna lah ai, titih sandeih angla kaawk ruila Pathen cathli te a mee tong tong, (1Piter 5:8). Te dawngah na cehna lawngpui te noopcaap langtah na khawleh a cakna ben ah te cet lah; banvoi bantang benla nawng bol, a thee benla na khaw te kaan bol (Tahtuk 4:26,27). Tu ah ti atah thlangdong kah lawngpui lawngtah thaihu thee te a reel (Tahtuk 16:17a). Thlawnna ben thui tlaih myhla thlawn te cathli sykna khui ah a tlaakna nawh hamla, sykhalhna taana hamla Pathen cathli lawng n'sai hamkoi pali aka awm Baibul lawng avan thui he byh u lah sih.

1. David Sengpahrang lawng, Aphu aka awm nawh thaihu benla ka mik rawi he daisak bol lang; na awl angla ka mik rawi he khom lah, (Saam 119:37) tila Bawipa tengah thangthui. Huhna, zaakna, pokna, ngaihna, mingna lawng hin rook ah thlanghing he a maawt. N'thaihu ngaihna a awmna benla kawpok lawng n'ceh pui. Tekah pokna lawng thlanghing te a taa atah a pokna ben la hing. Te dawngah thlanghing aka taakung thaihu te ahih kah bawi la awm (2Piter 2:19b). Pokna a zahawh atah m'pokna lawng zahawh n'taa van. Thlaang kah a haam ke na byh atah namah khaw puu na haam van nizaw? Awl on thui kaa de, lungbui pokna lawng a thui awl te a vai nawh atah a pokna ben la ni kop kop mel. Hin at ah Nu Helen lawng Samin khaw kah a paai mu im tengah a heh tih mezoh nym a awm congah Samin la kop a voi taak. Kop a law bal veng atah a canu Julia haih avan law pui. Julia te kum li law ca khong. Te vengah thlemvaai veng kah apaai mu a heh te pou tih a paai pateng mym kang tih phyrh tawm ca boih pon. Ym tangkiik ruila a canu Julia a khy tih, 'Tami, byh lah he, kai lawng a paai ka heh te tahe kop paai tawm pon he,' a tina. A canu lawng a byh van tih a ym hih tangkiik. A byh hih cong tih a ceh taak tawm atah, a canu nala, "Tami, a paai he sik bol be," a tina. Te congah cet hih. Tede a manu a ceh cong khongah, a canu Julia te kop mel tih a paai mym te khat khaw thlung tlaih myh la biit a sih. Thleem ben ah a paai te a manu lawng a byh kop bal vengah khat khaw awm tlaih nawh. A u lawng a sih, tila a doot vengah a canu lawng a sih tite a ming. A thinsa tangkiik ruila a canu te a bawh. Avan thui u vengah ka nui ka nui u. Tu dawngah Julia lawng a manu lawng a thui pe lal lal ah apaai biit a sih? Camo la a awm dawngah aw? Oih, tekhaw a sogna awm. Tede te lak ah aka song ngaai tah, apaai pokna, sih hamla ngaihna te atlo thaihu pokna lawng a thaw pe nawh dawngah ni. A manu lawng tekah apaai kawng pokna lak ah camo lawng a ngaih ngaai atlo pokna a kaw khuiah poksak kawinih, metyk ahkhaw apaai te sik nawh my. }} Sykna me kalawng a law ti atah lungbui ngaih pokna dawng kalawng ni a law. Lungbui he thlanghing aka maawtkung la awm tih Seitan lawng huur hamla a ngaih. Tede he he pok lah: "Nangmi he namami ko la na awm u monih, nangmi tah aphu on lai la na awm u pon dawngah na pum on Pathen te thangpawm u lah," (1Korinth 6:19). Pathen ko la na awm pon dawngah athee thaihu me ang pokna lawngkhaw na lungbui a van huur vengah heng taak. Na thinkaw khui ah pokna theen nawh a awm lii veng teah pokna aka theen on thaw tlengtlap praap. Bawipa kah awltak pokna on atlo kawpok theen on na kawpok te thaw lah. Thaihu theen nawh lawng n'taa bol seh, thaihu theen on thaihu theen nawh te taa lah, (Rom 12:21). Jesu te na thinkaw mik on byh lang pok mangkhak lah, (Hebrai 3:1). Bawipa Jesu te pok zozah langtah, (2Timote 2:8), … aka song boih, thangpawm koi boih, aka thym boih, aka ciim boih, lungna aka kap boih, nai hamkoi boih, n'tu khaw aka theen tih koh ham tyyngthli boih – te ang thaihuthli te van pok uh, (Filip 4: 8). Thaihu theen nawh pokna lawng lungbui a caak tih pawcina benla a maawt. Awl hawng on 'rih bol ne,' n'ti vengah, rih na zahawh a awmsak lat. Thlaang saw ah kawlawna nawh kawng pok vengah ihmyh lawhnai la ng'awm tare. Te te Seitan kah sykna lawngpui theen kok pon ni. Kri thlaang Pathen cathli la ng'awm u dawngah, sykhalhna a law vengah Kri saithaina on a bawilenna pok tih thawlhna te taa hamla awm. Te atah thawlh sykna te heng badai. Na heng taak atah na loih ai, sykna te na taa pon! Zou Sep angla sykna te heng taak. (Pa Im Teng khaw a heng dawngah loih).
2. A pabe sykhalhna taana lawngpui tah Pathen cathli tengah na raina on sykhalh na taawngna te phawng, thui pelah. Pathen cathli he amah byng awm thai nawh. Bawipa lawng Pathen cathli thik at la a khyhna hetah athee atheen minghaih awmngaih haih, kawthee haih hamla ni. Baibul lawng he tila avan thui: Pahih tah pakhat lak ah theen bet,… dawmthlaaikung khyh myhla aka tlim thlaang tah a reen ham awm; Amah byng aka awm tetah thlaang lawng a piaawk mai suide, pahih rawi tah huur ahih thai, rui pathum m'veh atah zy pat nawh, (Ecclessiastes 4:9, 12) ti. Pathen lawng hyn theen kok Eden ah Adam a khyh congah pateng khaw amah byng awm te theen nawh, ti tih Evi a sai pe atah, he diklai thawlh ralrih awmna ram tare atah Pathen cathli ruun u thee tih thaa lawh haih tare hamla awm. Raina, sykhalhna on patangna a law vengah ongcathli te pyn tih rangpui la Bawipa tengah thangthui pui hamla awm. Bawipa lawngah: Raina na taawng hin vengah ng'khy lah; kai lawng kan loihsak vetih, te atah kai te nan thangpawm ai, (Saam 50:15) ti. Khat on khat Bawipa ming ah pawlneeng u tih khat on khat saw ah khawdawp ngaaina on khat on khat hamla thangthui u hamla awm (Jakop 5:16). N'raina, bongha angla pum dawngah n'caak u te thuh khak myhla, thui, phawng tih tuui hamla awm. Bongha thuhkhak tih tuui myhla a awm atah ahu la te bongha lawng raina abou ngaai m'peek thai. Seitan lawng atah na thawlhna, na raina te phawng nawh hamla, zahrau zahdeng la m'poksak ai. Tede awltak Baibul lawng avan thui tah, aka thawlh nawh u ca khat khaw awm nawh (Rom 3:23) tila avan thui tih, thawlh sykna raal aka tuk boih la ni ng'awm u (1Korinth 10:13) ti. Thawlhna, raina, sykhalhna n'taawng vengah Pathen haaiah phawng myhla, ongcathli tengah pyn myhla awmna hetah mah on mah aka song kok la ngaaina u, nawh atah, zahrau thaihu la Seitan lawng poksakna dawngah ni. Pathen haai ah dungvong la ng'awm thai nawh dawngah mah kah ahyp thaihu thawlhna te thui hamla n'rih. Thui myhla a san na khyh atah te lawng ng'ngawn ai. Bawipa awl lawngah, 'Aka ook u te Pathen lawng a olh tih, dungvong la aka awmthli tengah reenna a peek,' (Jakop 4:6) ti. Sykhalhna na taawng vengah ongcathli on bawm u langtah tuk lah. (Pa Im Teng khaw lou kah thlaangthli lawng heng hamla a dook u tih te ni a heng van.)
3. A pathumna sykhalhna taana lawngpui tah, Raai te na tuk van hamla ni. Raai te na tuk atah na teng kalawng heng ai (Jakop 4:7). Diklai dawng kah ongca Pathen thlaangthli boih he raal aka tuk li la ng'awm u. Laa dawngah, 'Raltukna on kawthee-na, tuiphu angla thou cakhaw; Jesu rang on u lawng nym n'taa tang ai," (Pathen Thangtheenna laa, No. 271) tila n'sak angla seitan raal boih n'tuk u. Metila seitan raal te n'tukna ai? Lamha la ming ham aka awm tah Pathen ca la ng'awm pon dawngah Seitan lawng amah ngaih angla ng'hawna thai nawh, ti he ming hamla awm. Tede, na thinkaw lungbui ahong la a awm atah, sykna te a lawsak. Namah kawngaihna, na imkhui ah raina, na pui na paw on aw, nawh atah na ngona soprep te aty theen la a lawh vetih, 'te tila sai saw, theen ai ta,' tila na kaw khuiah a lawsak ai. Tede Pathen cathli lawng tah Pathen awl on tekah sykhalhna awl te nyhtah hamla awm. Paul lawng Seitan raal tukna phawlip a thui te muk lah. 'Seitan kah kamthlahna te na khoongna u thai hamla Pathen kah phawlip cungkym on thokcau u lah,' ti, (Efesa 6:11). Thlawnna thii lumyk te myk u lang, Pathen Awltak muithla samsen te pawm u lah, (Efe. 6:17) ti. Pathen awl on Seitan kah zookna te daam hamla awm. Metila n'daamna ai? Bawipa Jesu amah lawng dan ham, oot hamkoi avan sai pon (Mathai 4:1-11). He awl he tee delah. Pathen awl on Seitan kah pala alh te daam lah. Pathen awl tah a thaa a raa dawngah (Hebrai 4:12), Seitan lawng a rih. Na kaa ro ro on Pathen awl te pahoi pahoi thui langtah Seitan te ongna phring on dee lah. Heng badai. Heng kheng kheng ai, dee mah dee lah. Namah thaa on Seitan te taa hamla kamthlah bol. Sandeih aka kaawk te namah thaa on taa hamla kamthlah bol. Na taa nawh my, ng'ngeh zozah ai. Lumpawk on na kah ah ni a song ai. Lumpawk tah Pathen Cabu ni. Tede na kaw khuiah Pathen awl caryp na khyh dengah ni (Kolosa 3:16) Seitan te na kah thai hyn bal ai. Matu ram ah lumpawk athai pai pawk pon. Lai van langtah caryp khaw khyh lah. Rap dawngah lumpawk khyh sut tih caryp aka awm nawh angla, Baibul tah awm pon de, na tee nawh, na kaw khuiah na khyh nawh atah seitan raal na taa thai manawh. Pathen awl te kym langtah hawnah. He he Seitan sykhalhna taana lawngpui ni. Pathen Awl caryp on Seitan te kaap lah. A tal lungah na kah phek vetih Goliath angla tlim kyng congah a rawn pateng khaw Pathen awl samsen on na tlok thai ai.
4. Namah on namah yp u bol lang Bawipa thaa ypna lah. Namah on namah te kai he Bawipa kah ni, tila ming lang, thui popa lah. Na thinkaw boih on Bawipa te ypna lang, namah kah mingna dawngah hangdang u bol. Na ceh na awmna rook amah te ming lah, te atah na lawngpui avan dongsak ai, (Tahtuk 3:5-6) tila Bawipa awl lawng avan thui. Ka ming pon ta a! Ka taa badai, coong badai, tila namah kah pokna mailai dawng hangdang u bol. Bawipa awltak nawh atah mah lungbui he khaw ypna ham awm nawh. Tu ah ti atah thinkaw he zakming thai lek nawh tola thailat aka raa la awm (Jeremiah 17:9) tila Pathen awl lawng avan thui. Te dawngah, ka taa thai badai, ti langtah, thaihu theen nawh saina ah, awl theen nawh thuina ah ngah ngah awm bol, vik ceh taak. Ka yh thai badai, ti bol. Te ang thaihuthli te reel lah. Thlangcuih lawngtah Bawipa te a rih tih thaihu theen nawh te a heng taak; tede thlangngau lawngtah pokna khyh myh la praap praap a muk, (Tahtuk 14:16) tihe ming ham awm.

Hekah sykhalhna raal taana lawngpui pali he hawna lah. Te atah Seitan raal, sylkhalhna na taa thai pon ai.

Dyk tola yp awm la awm lah, hingna bawi lumyk te kan peek ai, (Awlphawng 2:10b).
Bawipa Lawng He Awl aka teethli boih sawah Seitan saw ah taana pe hawn seh.
Amen!

----- 000 -----

(November 29, 2007) 26 Bukit Sedap Road, Singapore 279924