Oih A! Ti Maisih

Oih A! Ti Maisih
By: Chronostrepho

“Aza, me kalawng na pok? Na sa ding aw? Na zu na ca ta navan law pui aw?”

Hin at ah pia rawi thlaang pahih cadawng Pa Sawng on Rui Thlaang pok myh la hum ahih tih cadawng Pa Sawng lawng Cadawng Rui Thlaang te a saw kah awl angla a tina congah kut a tuuk.

Te vengah cadawng Rui Thlaang lawng cuihcaih cuihcaih a nuih ruila, “Oih a! Ti maisih,” a ti congah, ana pia kah awl te he tila a thlat pe. “Ng’huhna hih nawh kum ha dalh law pon tih, nang khaw dalh kan haai pon ta a! Nan voom nawh kawinih kan ceh taak pon ai tate. Tihin hang atah Malaysia on India ngai la cet u tih te ben la ni na ceh van cawini, tila ka pok ta,” a tina.

Pa Sawng lawngah, “Mela ka ceh bal ai. A nu a pa khaw patawng hih pon tih, kai lawng ka ceh taak vik kawinih, a u lawng byh manawh, ka ti tih, mela khaw ka ceh monih. Nang ta tu na sai?” a tina.

Te vengah Rui Thlaang lawng, “Kai khaw kamah khaw ah ni ka awm hyn ca. Sengim ka cong congah bi ka dang khom ai nym, ka ti tih ka dongvong aroh van de tangka peek ham ka khyh nawh tih bi khaw ka sawh rop tlaih monih. Khawlawng thla ceh ham khaw a nu lawng n’thlawh khak tih ka ceh thai nawh.” Cuihcaih nui tih, “ Na zu van lou langtah te congah na ngaih atah cet, n’tina de ta. Ka kaw on ka rolh hulathli khaw, mekah, parcel la kang a pat u tih a u a awm tlaih monih,” ti ruila a pia te a mikhaai ah a byh.

Pa Sawng lawng, “A nang, na kum mezoh a law oom pon ca he? Na sam khaw thom aka paawk van pon ang a ti la?” a tina.

Rui Thlaang te cap nui tih, “ Sawm thum kum rih law van pon he. Nang on ng’kum vai hih om ta nizaw? Nang lak ah thla hih ka haam bet mai cawini. Ka sam khaw me tila kai nym he, thom paawk van praap pon he mm. Sam myym sii on bet ka thiim van he. Tih nawh kawinih hulathli lawng patawng hau n’sak u vetih, n’rih hau u mai ai, ka ti tih,” a tina.

Te vengah Pa Sawng lawngah, “Oih a, tihin hang cadawng hulathli kah thloihthlam u angla khaw bet thloihthlam u a ngo van pon he. Tih nawh kawinih, Valang khaw kah Ngawl Kawl, Cangtaak kah Thang Boi angla zu taal la cadawng pawng la ng’awm sawl ai ta o,” a tina van.

Rui Thlaang lawng, “Hulathli khaw awm van de, ka kaw khyk aka ti he ka hu nawh mangkhak ca he. Ka kaw a tlaak atah a thlaang a theen nawh ahkhaw, thlaang a thee aih nawh atah, ka be mai hawn ai,” ka ti praap van pon deta.

“Me ang hula nym ca na tyk bal? Valang nuthli, Ngala nuthli, Leiring nuthli puul puul pet u na hu nawh aw ke? Malaysia on India la cadawngthli lawng a ceh taak kang u tih hulathli pawng u sut pon ta ke. Vaa sak a ngaih u yyt ah Pathen aka ming nawhthli, thlangtlo namthli a thlaak la a thlaak u praap pon ta ke. Parcel la khaw a pat boih u aih van monih. Awm u hyn ca! Na ngaih tang tang atah kai lawng kavan tlap ai saw?” tila a nuih ruila Pa Sawng lawng Rui Thlaang te a mikhaai ah a byh tih a tina.

Rui Thlaang lawng, “Oih ca, te tila aka congdook soh hulathli te nawh aw, ka rih laawt te. Thui praap mai lah sih. Tihin hang kah hukhyng tlawhna aka khyh khaw n’zuna plong hau ai, ka ti tih ka rih laawt. Hmantang ah ka ngaih he ka thui mai lah ai. Hing khui pyr zuva la awm ham dawngah, Pathen aka tangna, thlangbol aka lungna, Pathen bawkna benah lungbui aka pe thlaang he number pakhatna ah ka ngaih. Te congah, a thlaang a theen pawkzawk pai ahkhaw a thaa zawng tih bibi khaw aka ngak tah ka ngaih nawh. Te congah a kaw aka awm nawh, thuina maiah hinzah koi khaw ming nawh, reen hamkoi khaw aka ming nawh, anu apa khaw aka lungna nawh koi tah ka pok hanlan tlaih nawh. Te congah awlcal thingka aka theen, azoi la kaw aka daw, thlaang aka voomtooi thai, tangka phaisa dawngah cuihna aka khyh, atyyng nawh la thaihu aka ngaih praap nawh, kutverh aka khyh nawh, moi khaw aka thee aih nawh, amah pok van atah aka thloihthlam u thai popa, thlarui thlasam ben thaihu, thuina maiah, hii huithli, hii tah thai khaw a ngo van bal. Buh an thawng khaw aka thoom ti maisih. An aka hop thai nawh, an aka paawt thai nawh, azoi la mah Matu caak aawk aka ming nawh tah ka tawh hih pyt vetih roproina imkhui ah awm manawh. Matu la ka thang ouh tih, Matu anbek, andam nawh atah buh an khaw ka kaw khyk pha nawh ouh he. Te congah thlemhah kawnphai, cinghyy aikhaawk ah siik syyk toi hih ham mah Matu nu cing ka zuna van makawi, ka ti mangkhak. Mah nu tah mah lawng man nih n’lawh pai sui nizaw? Thlaang kah khawsak singzoo khaw aka ming thlaang a ngo. Ca tang a saang aih nawh ahkhaw Kawl awl, mah lai awl on thlaang kah khawsak lawng aka ming thlaang sui ka ti bal. Aka maawl aih thlaang tah zahrau la pia lak ah awm vetih theen manawh. He ang thlaang, ti maisih, he zu hamla ka ngaih de ta o,” a tina.

Pa Sawng lawng Rui Thlaang kah awl te a hutuung heet tih awlthui a boih cong atah, “Kai angla nawh aw phek na pok van pai te. Te tila nawh aw, kai khaw ka pok tih tahe to ka zu ka dang nawh laawt he. Te khaw aka theen te ng’ngaih dawngah zu theen nawh n’lawh tih hing khui pyr thinkaw pumsa khawdeng patang la awm lak atah tahe ah m’patawng aih pon monih. Pathen tengah thangthuina on bih de lah sih. Kaimi pum im atah nuthli buhzeh thangthuina Ryng hin (zarhte) hin rook ah a sai u tih, teah zu theen ka dangna hamla, ka ti tih thangthuina ka bih de ta,” a tina.

Te vengah Rui Thlaang lawngah, “Oih a! Ti maisih, kai khaw te te theen tila ka pok te. Kamah lawngtah ka tlap van pon de, Pathen tengah thangthui tih bih he theen tangaak ai. Kai hamla khaw thangthuina van khyh u van lah seh ne,” a tina.

Pa Sawng lawng “Oih a, kavan thui badai,” ka cet delah ai. Tahe kalawng kop huh hih bal sih ne,” a tina ruila pahoi pek ahih.